Skandal në Itali: Volejbollisti i njohur kërcënohet me vdekje bashkë me familjen për shkak të një gabimi në fushë

Një situatë alarmante ka ndodhur në kampionatin italian të volejbollit, ku organizatori i skuadrës Cuneo Volley, Manuel Coscione, është bërë shënjestër e kërcënimeve makabre me vdekje në rrjetet sociale. Ky reagim ekstrem ndaj sportistit erdhi pas një gabimi teknik në ndeshjen e luajtur kundër Perugias. Në këtë sfidë mjaft të fortë dhe dramatike, Cuneo u mposht me rezultatin 3-2 nga ana e kampionëve të Italisë, pas një beteje sportive që zgjati deri në pikat e fundit të takimit. Kthesa e ndeshjes ndodhi gjatë setit të pestë, kur Coscione dështoi në shërbim në një moment vendimtar, ku skuadra e tij kishte mundësinë e artë për të mbyllur ndeshjen. Perugia përfitoi nga ky gabim për të përmbysur situatën dhe për të siguruar fitoren. Menjëherë pas përfundimit të sfidës, një profil i rremë në platformën “Instagram” i drejtoi volejbollistit mesazhe fyese dhe kërcënime serioze, të cilat nuk kursyen as anëtarët e familjes së tij. Mes frazave më të rënda të dërguara ishte edhe ajo se “e gjithë familja jote do të vritet”. Përballë kësaj situate të rëndë, Coscione ka ndërmarrë menjëherë hapa ligjorë duke denoncuar rastin në organet kompetente, ndërkohë që ka bërë publike mesazhet kërcënuese. Ai ka nënvizuar se një gabim i natyrës sportive nuk mund të shërbejë kurrë si alibi për sulme personale dhe cënim të sigurisë së familjarëve. Pas këtij incidenti të shëmtuar, Shoqata Italiane e Volejbollistëve ka dalë me një deklaratë zyrtare, duke i dalë në mbrojtje sportistit dhe duke dënuar me ashpërsinë më të madhe çdo formë dhunë verbale apo kërcënimi.