Këtë fundjavë kthejmë akrepat: Mësoni kur ndryshon ora dhe çfarë sjell kjo

Këtë fundjavë do t'i japim lamtumirën orës verore, pasi gjatë natës ndërmjet së shtunës dhe së dielës, më 25 tetor, do të hyjmë në kohën e re. Saktësisht në orën 03:00 pas mesnate, akrepat e orës do të lëvizen një orë prapa, duke u kthyer në orën 02:00. Ky ndryshim do t'u mundësojë qytetarëve të bëjnë një orë më shumë gjumë gjatë asaj nate. Pajisjet moderne, si telefonat e mençur, kompjuterët dhe mjetet e tjera të lidhura në internet, do ta bëjnë përshtatjen e orës në mënyrë automatike. Megjithatë, orët tradicionale dhe ato pajisje që nuk kanë qasje në rrjet do të kërkojnë ndërhyrje manuale. Kjo lëvizje e akrepave sjell gjithashtu ndryshime në ciklin e dritës së ditës. Agimi do të zbardhë më herët në mëngjes, por në krahun tjetër, errësira do të mbizotërojë më shpejt gjatë pasditeve dhe mbrëmjeve. Sipas praktikës së vendosur, sistemi i orës verore nis në të dielën e fundit të muajit mars dhe përfundon rregullisht në të dielën e fundit të tetorit. Kujtojmë se në vitin 2018, Komisioni Evropian kishte dalë me një propozim për shfuqizimin e lëvizjeve sezonale të orës, nismë e cila mori mbështetjen e Parlamentit Evropian në vitin 2019. Megjithatë, vendet anëtare të Bashkimit Evropian ende nuk kanë arritur një konsensus përfundimtar se cila prej kohëve, ajo verore apo ajo standarde, duhet të mbetet përgjithmonë në fuqi.