Kurti takon ministrin francez Haddad: Mbështetje e rëndësishme për Lojërat Mesdhetare 2030 dhe integrimin evropian

Kryeministri i Republikës së Kosovës, Albin Kurti, ka zhvilluar një takim në Shën Stefan me ministrin e Deleguar për Evropën të Francës, Benjamin Haddad. Gjatë këtij takimi, dy zyrtarët e lartë kanë biseduar mbi thellimin e bashkëpunimit dypalësh, konkretizimin e marrëveshjeve ekzistuese, si dhe mbi situatën politike dhe zhvillimet në rajonin e Ballkanit Perëndimor. Nëpërmjet një reagimi publik, kreu i ekzekutivit kosovar ka vlerësuar se bashkëpunimi i ngushtë me shtetin francez po prodhon rezultate të prekshme dhe po krijon perspektiva të reja zhvillimore për vendin. Sipas shefit të Qeverisë, pas finalizimit të pesë marrëveshjeve dhe instrumenteve gjatë vizitës së ministrit Haddad në Prishtinë në muajin korrik, palët janë angazhuar plotësisht në jetësimin e tyre praktik, me qëllim avancimin e fushave kyçe si drejtësia, arsimi dhe sporti. Kurti ka vënë in dik Taksë edhe miratimin nga ana e Kuvendit të Kosovës të kredisë në vlerë prej 60 milionë eurosh, e cila do të destinohet për zhvillimin e infrastrukturës së nevojshme për organizimin e “Lojërave Mesdhetare 2030”, duke e cilësuar këtë si dëshmi të qartë të partneritetit të suksesshëm me Parisin. Në fokus të bisedimeve kanë qenë edhe sfidat dhe e ardhmja politike e Ballkanit Perëndimor, ku është trajtuar lidhja e ngushtë mes paqes, sigurisë rajonale, standardeve demokratike, sundimit të ligjit dhe procesit të integrimit evropian. Në fund të takimit, kryeministri Kurti ka kërkuar dhe theksuar domosdoshmërinë e mbështetjes së vazhdueshme të Francës në rrugëtimin e Kosovës drejt anëtarësimit në Këshillin e Evropës dhe në Bashkimin Evropian.