Kombëtarja nis përgatitjet për Austrinë, “Fadil Vokrri” drejt “sold out” për sfidën e 4 tetorit

Pasi triumfoi mbrëmjen e djeshme me rezultatin minimal 1-0 kundër Irlandës, Përfaqësuesja e Kosovës ka lënë pas festimet për t'iu përkushtuar menjëherë sfidës së radhës në grup, ku në prag është përballja e vështirë kundër Austrisë. Gjatë seancës stërvitore të zhvilluar sot, trajneri Franco Foda ka pasur nën urdhra 16 futbollistë. Ndërkohë, titullarët e ndeshjes me Irlandën janë kufizuar vetëm në një seancë rigjenerimi brenda ambienteve të hotelit, me synimin për të rikuperuar energjitë pas harxhimit të madh fizik. Pavarësisht kësaj, morali dhe entuziazmi mbeten në nivele shumë të larta brenda grupit të “Dardanëve”. Suksesi i arritur në nisje ka rritur ndjeshëm besimin, por tashmë i gjithë fokusi është zhvendosur te dueli i ardhshëm në Vjenë. UEFA ka bërë publike edhe emrat e zyrtarëve që do të ndajnë drejtësinë në këtë takim, duke ia besuar fanellën e kryesorit skocezit Nicholas Walsh. Atij do t'i asistojnë bashkëkombësit Francis Connor dhe Daniel McFarlane, ndërsa rolin e gjyqtarit të katërt do jua ketë Donald Robertson. Në dhomën e VAR-it do të pozicionohen Steven McLean dhe John Beaton. Përballja mes Austrisë dhe Kosovës është planifikuar të luhet të dielën në stadiumin “Ernst Happel”, me fillim nga ora 18:00. Ndërkaq, interesimi i jashtëzakonshëm i publikut nuk ka munguar as për ndeshjen e kthimit që do të zhvillohet në Prishtinë. Sipas njoftimit zyrtar nga Federata e Futbollit të Kosovës, biletat për duelin e 4 tetorit në stadiumin “Fadil Vokrri” janë drejt fundit, ku pjesa dërrmuese e sektorëve janë shitur, duke lënë të lira vetëm një numër të kufizuar vendesh në tribunën VIP. Pas angazhimit në kryeqytetin austriak, “Dardanët” do të udhëtojnë drejt Hungarisë, ku të enjten e ardhshme do të matin forcat me Izraelin. Nisja e suksesshme me tre pikë ndaj irlandezëve i ka dhënë një shtysë pozitive këtij rrugëtimi, por përpara skuadrës tani ngrihen sfida të reja dhe tejet komplekse.