Gjyqtari nga Skocia do t'i ndajë drejtësinë sfidës vendimtare mes Austrisë dhe Kosovës në Vjenë

Përballja e rëndësishme e Grupit B3 të Ligës së Kombeve mes Austrisë dhe Kosovës, e cila do të luhet sot në kryeqytetin austriak, do të drejtohet nga gjyqtari skocez Nicholas Walsh. Krah tij në fushë do të jenë bashkëkombësit e tij Francis Connor dhe Daniel McFarlane, të cilët do të mbajnë rolin e anësorëve, ndërsa pozita e gjyqtarit të katërt i është besuar Donald Robertson. Ndërkohë, dhoma e sistemit VAR do të menaxhohet nga dyshja Steven McLean dhe John Beaton. Të dyja përfaqësueset futen në këtë duel me nga tri pikë në llogarinë e tyre. Përfaqësuesja e Kosovës e ka nisur mbarë këtë edicion duke triumfuar 1-0 ndaj Irlandës në stadiumin “Fadil Vokrri”, falë një realizimi në çastet e fundit të sulmuesit Vedat Muriqi. Për sfidën e sotme, përzgjedhësi Foda po mendon ndryshime në rreshtimin taktik të skuadrës. Megjithatë, “Dardanët” do të duhet t'ia dalin pa mbrojtësin Albian Hajdari, i cili është i detyruar të mungojë për shkak të një dëmtimi të pësuar në ndeshjen e kaluar kundër irlandezëve. Nga ana tjetër, Austria e ka nisur fushatën e saj me një fitore bindëse 3-1 në shtëpi përballë Izraelit, duke i dhënë edhe më shumë peshë dhe rivalitet duelit të sotëm që do të zhvillohet në Vjenë.