Ndryshime në ekipin mbrojtës të Kadri Veselit: Largohen dy avokate para nisjes së Apelit

Ekipi mbrojtës i ish-kryeparlamentarit Kadri Veseli ka pësuar ndryshime të reja në prag të hapjes së fazës së Apelit në Dhomat e Specializuara të Kosovës me seli në Hagë. Dy bashkëavokate, Annie O’Reilly dhe Kerrie Ann Rowan, kanë përfunduar angazhimin e tyre dhe nuk do të jenë më pjesë e mbrojtjes. Sipas të dhënave nga Zyra e Regjistrit, vendimi për ndërprerjen e menjëhershme të kontratave të tyre është marrë më 13 tetor nga avokati kryesor i Veselit, Rodney Dixon. Ky zhvillim është formalizuar edhe zyrtarisht një ditë më vonë, më 14 tetor, kur Regjistri konfirmoi largimin e tyre nga grupi i mbrojtjes. Në dokumentin drejtuar Zyrës së Mbrojtjes, avokati kryesor Dixon ka siguruar se ky largim nuk do të ketë asnjë ndikim negativ në mbrojtjen e interesave të Kadri Veselit dhe nuk do të shkaktojë vonesa në ecurinë e procesit gjyqësor. Ky njoftim zyrtar është dorëzuar tashmë në Panelin e Apelit të Dhomave të Specializuara të Kosovës në Hagë, duke shënuar një lëvizje të re organizative brenda mbrojtjes së Veselit.