Thirrja e Rudina Hajdarit për studentët: Mos e refuzoni dialogun, merrni shembull nga Lëvizja e Dhjetorit '90

Ish-deputetja Rudina Hajdari u ka bërë thirrje të hapur studentëve dhe protestuesve që të mos i mbyllin dyert e dialogut me kryeministrin Edi Rama. Për të ilustruar rëndësinë e këtij hapi, ajo ka sjellë në vëmendje trashëgiminë e të atit të ndjerë, liderit të Lëvizjes Studentore të Dhjetorit '90, Azem Hajdarit, dhe përballjen historike të atij brezi me udhëheqjen e kohës. Përmes një postimi në rrjetet sociale, Hajdari ka ndarë me ndjekësit një fotografi arkivore nga dhjetori i vitit 1990, kur Azem Hajdari dhe përfaqësuesit e tjerë studentorë u ulën në një tryezë ballë për ballë me Ramiz Alinë për të kërkuar ndryshimin dhe vendosjen e pluralizmit politik në vend. “Uluni në dialog, por me transparencë, jo pas dyerve të mbyllura. Mos i humbni këto mundësi! Unë do të ulesha e para në ato karrige dhe do të përballesha drejtpërdrejt me Ramën. Ai nuk ka si të mbrohet përballë argumenteve tuaja. I keni të gjitha argumentet për të arritur maksimumin e kërkesave tuaja”, ka shkruar Rudina Hajdari në mesazhin e saj. Në mesazhin e saj, ajo ka rikujtuar se për Azem Hajdarin dhe studentët e dhjetorit, dialogu nuk përbënte kurrë një tërheqje nga parimet, por përkundrazi, një instrument kyç për të mbrojtur interesat dhe kërkesat e tyre para pushtetit. Si dëshmi e kësaj qasjeje, ajo ka sjellë në vëmendje fjalët e të atit gjatë ballafaqimit me Alinë, ku kërkohej që i gjithë procesi të ishte transparent dhe i regjistruar për t'u dëgjuar nga gjithë trupa studentore. Në atë kohë, Azem Hajdari argumentonte se përfaqësuesit e studentëve ishin të mandatuar drejtpërdrejt nga baza për të mbrojtur pikë për pikë programin e miratuar bashkërisht. Ai theksonte se vendosmëria dhe këmbëngulja në rrugën e proceseve demokratike ishin çelësi i suksesit për të ardhmen e gjithë popullit shqiptar. Duke u bazuar te kjo frymë historike, Rudina Hajdari u kërkon protestuesve të sotëm të mos i ikin tryezës së bisedimeve, por të hyjnë në të të armatosur me fakte, duke mbrojtur fuqishëm kauzën e tyre përballë çdo sfide. “Nuk ka njeri më trim se Azem Hajdari, edhe ai u përball me diktaturën. Nëse nuk uleni ju, dikush tjetër do ta bëjë dialogun në kurrizin tuaj”, përmbyll mesazhin e saj ish-deputetja Hajdari, duke u bërë thirrje të rinjve që të tregojnë pjekuri dhe guxim politik.