Marrëveshje historike te Bayern Munchen: Viessmann derdh 250 milionë euro për kuotat e klubit

Gjiganti i Bundesligës, Bayern Munchen, ka siguruar një injeksion financiar prej 250 milionë eurosh, pas zyrtarizimit të hyrjes së “Viessmann Generations Group” në strukturën kapitale të shoqërisë që menaxhon futbollin profesionist të klubit. Sipas marrëveshjes, kompania e investimeve e familjes Viessmann do të sigurojë fillimisht 5% të aksioneve të FC Bayern München AG, një shifër që pritet të ngjitet deri në 6.7% përmes një procesi të rritjes së kapitalit. Kjo marrëveshje shënon transaksionin më të madh monetar të realizuar ndonjëherë nga klubi bavarez nëpërmjet shitjes së kuotave. Këto fonde të reja pritet të shtojnë ndjeshëm rezervat financiare, duke i dhënë një hov të ri autonomisë ekonomike të klubit. Duke u bazuar te blerja fillestare e 5% të aksioneve, vlera e përgjithshme e klubit të Bayern-it llogaritet në rreth 5 miliardë euro. Për të krijuar një panoramë krahasuese, tre partnerët historikë të klubit – “Adidas”, “Audi” dhe “Allianz” – kishin investuar gjithsej 277 milionë euro ndër vite për t'u bërë pjesë e kapitalit. Më konkretisht, “Adidas” investoi 77 milionë euro në vitin 2002, “Audi” derdhi 90 milionë euro në vitin 2010, ndërsa “Allianz” kontribuoi me 110 milionë euro në vitin 2014. Duke komentuar këtë zhvillim, presidenti i Bayern-it, Herbert Hainer, u shpreh se ky hap konsolidon strukturën e FC Bayern Munchen AG. Ai shtoi se baza e përmirësuar e pasurisë në kohët e fundit u siguron atyre hapësira më të mëdha veprimi në një treg që ndryshon vazhdimisht. “Viessmann Generations Group” drejtohet nga 37-vjeçari Max Viessmann. Familja e tij fitoi vëmendje të gjerë në vitin 2023 kur i shiti divizionin e klimatizimit gjigantit amerikan “Carrier Global” për afro 12 miliardë euro. Max Viessmann, i cili tashmë është anëtar i këshillit konsultiv të Bayern-it, do të bëhet pjesë edhe e këshillit mbikëqyrës, duke çuar numrin e anëtarëve të tij nga 9 në 10. Nga ana e tij, klubi ka bërë të ditur se kapitali i ri do të kanalizohet kryesisht drejt nismave për qëndrueshmërinë, procesin e digjitalizimit dhe zgjerimin ndërkombëtar. Njëkohësisht, ky operacion rrit ndjeshëm fuqinë blerëse të bavarezëve në tregun e transferimeve, sidomos në prag të projekteve për përforcimin e skuadrës dhe rinovimit të kontratave me lojtarët kyç. Pas këtij ndryshimi, pjesëmarrja e “Adidas”, “Audi” dhe “Allianz” do të pësojë një ulje të lehtë nga 8.33% në 7.8%, ndërsa kuotat e “Viessmann” do të arrijnë në 6.7%. Pjesa e mbetur e aksioneve mbetet e palëvizur në duart e shoqatës “FC Bayern München e.V.”, në përputhje të plotë me statutin e klubit, çka do të thotë se nuk ka më hapësira për shitjen e kuotave te investitorë të tjerë të jashtëm.