Kërkesë urgjente në Premier League: Ndaloni fluturimin e shqiponjës në stadiumin e Crystal Palace

Organizata e njohur për mbrojtjen e të drejtave të kafshëve, “Peta”, i ka drejtuar një thirrje zyrtare klubit anglez të Crystal Palace, duke i kërkuar që të ndalojë praktikën e lëshimit të shqiponjës Phoenix para ndeshjeve që luhen në shtëpi në “Selhurst Park”. Nëpërmjet një letre zyrtare dërguar administratores së klubit nga Londra, Sharon Lacey, organizata thekson se një impiant sportiv i ndriçuar fuqishëm dhe i mbushur me dhjetëra mijëra tifozë entuziastë e të zhurmshëm nuk përbën ambientin e duhur për një kafshë të egër. Sipas të njëjtit burim, atmosfera kaotike dhe zhurma e madhe në shkallët e stadiumit përbëjnë një rrezik të madh për të frikësuar dhe çorientuar shpendin, çka mund të krijojë situata rreziku jo vetëm për vetë shqiponjën, por edhe për spektaklet e pranishëm në tribuna. Klubi nga Londra, i njohur me nofkën “Eagles” që prej vitit 1973, nisi traditën e sjelljes së një shqiponje të gjallë në impiantin e tij në vitin 2010. Për vite me radhë simboli i tyre ishte e ndjera Kayla, e cila u nda nga jeta në vitin 2020, ndërsa në muajin gusht të vitit 2024 në stadium debutoi shpendi i ri, Phoenix, një zhvillim që ka ngjallur që në fillim kundërshtime të forta nga shoqatat animaliste.