Përplasje në Kuvend: Gërvalla dhe Haxhiu 'përleshen' për punën e Faton Pecit

Seanca plenare e Kuvendit të Kosovës është shoqëruar me debate të ashpra mes krerëve institucionalë dhe opozitës, ku në qendër të vëmendjes ka qenë figura e ish-ministrit të Bujqësisë dhe kryetarit aktual të Mitrovicës, Faton Peci. Ministrja e Drejtësisë, Donika Gërvalla, ka marrë fjalën për të vlerësuar lart punën e bashkëpartiakut të saj, duke e cilësuar atë si një nga ministrat më të dalluar dhe më të guximshëm të kabinetit qeveritar Kurti 2. "Faton Peci do të mbahet mend për transformimin rrënjësor të gjithë zhvillimit të bujqësisë në vendin tonë, për luftimin e pakompromis të krimit dhe korrupsionit. Do të mbahet mend si një prej ministrave më të guximshëm të Qeverisë Kurti 2. E çka flitet në këtë sallë, do të duhet të jetë në përputhje me atë që dëgjoni nga familjarët, fqinjët dhe qytetarët e Republikës sonë", deklaroi Gërvalla gjatë fjalimit të saj në foltore. Kësaj mbrojtjeje publike i është kundërvënë menjëherë deputetja e opozitës, Teuta Haxhiu, e cila ka hedhur akuza të rënda, duke pretenduar se skandalet e Pecit janë të njohura për të gjithë opinionin publik. "Për skandalet e ministrit Peci e di krejt vendi. Unë për veti, me qenë në vend tëndin nuk kisha lëviz fare me mbrojtë një njeri që ka pru mish të skadum e që populli është ushqy me atë mish", u shpreh Haxhiu. Përballë këtyre akuzave, ministrja Gërvalla është kundërpërgjigjur ashpër, duke i cilësuar pretendimet e deputetes si aludime të pabazuara dhe sulme të padrejta politike. "Edhe një herë e konfirmuat që përpjekja për të hedhur baltë bazohet vetëm në fjalë, supozime, në fajësime të pavërteta. Ju asnjëherë nuk mund të jeni në vendin tim, se po të ishit në vendin tim nuk do të ishit ulur aty ku jeni dhe nuk do të rrethoheshit me njerëzit që jeni rrethuar", tha ajo në replikën e saj.