Declan Rice dalldis pas Harry Kane: E meriton absolutisht Topin e Artë

Mesfushori i Arsenalit, Declan Rice, ka dalë hapur në mbështetje të bashkëkombësit të tij, Harry Kane, duke e cilësuar si kandidatin ideal për të fituar çmimin prestigjioz “Topi i Artë”, pas duelit spektakolar të përfunduar me barazimin 2-2 mes Arsenalit dhe Bayern Munichut në Ligën e Kampionëve. Dy yjet e kombëtares së Anglisë ishin protagonistë kryesorë në këtë takim të zjarrtë të zhvilluar në “Allianz Arena”. Kane la gjurmët e jo me një, por me dy momente vendimtare, duke dhënë një asistim dhe duke shënuar një gol, ndërsa Rice u shndërrua në heroin e londinezëve duke realizuar golin e barazimit në minutën e 82-të. Sulmuesi i gjigantit bavarez nisi aksionin duke asistuar te Alphonso Davies për barazimin e përkohshëm, para se të tregohej i saktë nga pika e bardhë e penalltisë në minutën e 61-të, duke përmbysur shifrat në favor të skuadrës së tij. Megjithatë, insistimi i Arsenalit u shpërblye në çastet e fundit, kur Rice tundi rrjetën për t'i siguruar skuadrës së tij një pikë me peshë të madhe. I pyetur përfundimisht nga gazetarët pas përfundimit të ndeshjes rreth shanseve të Kane për ta fituar “Topin e Artë”, mesfushori nuk ngurroi ta shpallë atë si favorit absolut, duke i thurur elloge paraqitjeve të tij konstante dhe ndikimit vendimtar gjatë gjithë këtij viti. “Ai është fituesi i qartë. Statistikat e tij flasin vetë, ndërsa viti që ka pasur është i jashtëzakonshëm. Kur luan me të, e kupton sa i mirë është, ndërsa kur luan kundër tij, e sheh se sa i vështirë është për t’u përballuar”, u shpreh Rice gjatë prononcimit të tij për “TNT Sports”. Futbollisti i Arsenalit e quajti bashkëkombësin e tij një lojtar të përmasave të mëdha, duke shtuar se ndihet tejet me fat që ndajnë të njëjtën fanellë në kombëtare, pavarësisht se përballjet me të në arenën e klubeve mbeten gjithmonë një sfidë më vete. Në anën tjetër, Kane po kalon një periudhë fantastike dhe një formë të frikshme këtë edicion. Në vetëm 11 ndeshje të luajtura deri më tani, snajperi anglez ka regjistruar dhjetë gola dhe shtatë asistime, duke mbajtur të ndezur ritmin e lartë që pati edhe gjatë sezonit të kaluar. Gjatë bisedës me mediat, Rice ndau edhe emocionet rreth golit të tij ndaj gjermanëve, duke i thurur lëvdata lëvizjeve inteligjente të sulmuesit Viktor Gyokeres, i cili dha një kontribut vendimtar pasi u hodh në fushë nga bankina. “Jam shumë i lumtur. Gyokeres ka pasur ndikim të madh kur është futur nga stoli. Ai bëri disa lëvizje të shkëlqyera sonte dhe më krijoi mundësinë për të shënuar”, u shpreh ai. Mesfushori përmbylli duke vlerësuar karakterin e treguar nga Arsenali në një nga stadiumet më të vështira në Evropë, duke theksuar se ekipi i tij nuk zbriti në fushë thjesht për të mbrojtur portën, por për të bërë lojë të hapur dhe për të kërkuar maksimumin. Rezultati i barabartë 2-2 dëshmoi forcën dhe nivelin e lartë të dy skuadrave në këtë përballje të luftuar deri në sekondat e fundit, ndërkohë që deklarata e Rice i jep një peshë edhe më të madhe ambicieve të Kane në garën për kurorën e futbollistit më të mirë në botë.