Krizë te Manchester United: Humbja ndaj Comos lëkund stolin e Carrick, Conte dhe Nagelsmann në horizont

Pozita e Michael Carrick në krye të stolit të Manchester Unitedit është vënë në rrezik serioz, pas disfatës tejet të rëndë që skuadra pësoi nga Como në kuadër të Ligës së Kampionëve. Në ishull kanë nisur menjëherë aludimet rreth pasardhësit të mundshëm të anglezit, ndërsa zyrtarët e klubit nga “Old Trafford” thuhet se po analizojnë situatën për të ndërmarrë hapa konkretë në drejtim të stafit teknik, ku dy emra spikasin si favoritë kryesorë: Antonio Conte dhe Julian Nagelsmann. Tekniku italian Antonio Conte është një nga profilet kryesore që po lakohet për të marrë drejtimin e “Djajve të Kuq”. Duke qenë se ka drejtuar më parë Chelsean dhe Tottenhamin, ai gëzon një njohje të shkëlqyer të dinamikave të Premier League. Përvoja e gjatë në elitën evropiane, disiplina e rreptë taktike dhe mentaliteti fitues e bëjnë Conten një kandidat të preferuar, ndonëse emri i tij vazhdon të përmendet edhe si një opsion i mundshëm për Juventusin, në rast se torinezët vendosin të ndryshojnë te Luciano Spalletti, i cili aktualisht gëzon mbështetjen e klubit italian. Nga ana tjetër, strategu gjerman Julian Nagelsmann paraqet një alternativë tejet joshëse për drejtimin e gjigantit anglez. Ish-trajneri i Bayern Munichut dhe ish-përfaqësueses së Gjermanisë konsiderohet ndër mendjet më të ndritura të gjeneratës së re të trajnerëve në Evropë. Filozofia e tij e lojës dhe aftësia për të udhëhequr projekte afatgjata përputhen me ambiciet e larta të klubit anglez, nëse drejtuesit vendosin të nisin një ciklí të ri sportiv. Ditët në vijim pritet të jenë vendimtare për të kuptuar nëse drejtuesit e skuadrës nga “Old Trafford” do të marrin vendime drastike dhe cili prej teknikëve të lakuar do të besohet me çelësat e suksesit të radhës.