Gërvalla vlerëson Pecin: Do të mbahet mend për guximin dhe betejën kundër korrupsionit

Ministrja e Drejtësisë, Donika Gërvalla, ka dalë në mbrojtje të kryetarit të Mitrovicës, Faton Peci, duke theksuar se trashëgimia e tij politike do të lidhet ngushtë me reformimin rrënjësor të bujqësisë dhe luftën e pandalshme kundër paligjshmërisë. Duke iu kundërpërgjigjur akuzave dhe kritikave të drejtuara ndaj tij, Gërvalla e ka cilësuar Pecin si një ndër zyrtarët më të guximshëm që kanë shërbyer në përbërjen e Qeverisë Kurti II. “Për ta ulur pak nivelin e dezinformit dhe propagandës. Ministri Faton Peci, ish-ministri i bujqësisë, kryetari i sotëm i Mitrovicës. Do të mbahet mend për transformimin e bujqësisë, si një prej ministrave për luftimin e pakompromis të krimit dhe të korrupsionit, dhe do të mbahet mend si një prej ministrave më të guximshëm të Qeverisë Kurti II. E çka flitet në këtë sallë duhet të jetë edhe në përputhje me atë çka dëgjonim nga familjarët, nga fqinjët edhe nga qytetarët e Republikës tonë, të cilët çdo ditë dhe në çdo vend do t’ia përsërisin pikërisht këtë gjë tashmë”, u shpreh ajo.