Debakli në Champions, Carrick shpërthen ndaj lojtarëve: Paraqitja jonë ishte e papranueshme

Trajneri i Manchester United, Michael Carrick, ka dhënë një deklaratë të ashpër pas disfatës së rëndë 1:4 kundër Comos në Ligën e Kampionëve, duke shprehur pakënaqësinë e tij të thellë me paraqitjen e skuadrës. “Jam vërtet i zemëruar. Të luajmë në atë mënyrë është e papranueshme“, u shpreh trajneri anglez, i cili e vuri theksin te mungesa e qasjes së duhur nga ana e futbollistëve në fushë. “Patjetër që do të analizoj atë që kemi bërë ne si staf teknik ose nëse bëhet fjalë për motivimin, qëllimin, objektivin dhe intensitetin që duhet të shfaqësh në një ndeshje futbolli. Këtë herë nuk e shfaqëm këtë”, tha Carrick në analizën e tij pas ndeshjes. Më tej, ai shtoi se angazhimi nuk mund të trajtohet me opsione sipas dëshirës: “Nuk mund ta aktivizosh dhe çaktivizosh angazhimin sipas dëshirës. Nuk mund të zgjedhësh se kur dëshiron të luash mirë e kur jo, ose kur të japësh gjithçka e kur ndoshta jo”. Në fjalën e tij, Carrick nuk ngurroi t'u kërkojë falje mbështetësve të “Djajve të Kuq” që kishin bërë rrugë të gjatë për të mbështetur ekipin: “Nuk ishte çështje golash. Ishte mënyra se si luajtëm, ishte e vështirë ta shihje”. I pyetur për të ardhmen e tij që po diskutohet gjithnjë e më shumë, strategu anglez përfundoi: “Tani për tani, nuk bëhet fjalë për mua. Rezultatet mund të vijnë e të ikin, por duhet të luash në një mënyrë të caktuar. Ajo që pamë sot nuk ishte e tillë”.