Afati i Speciales në tavolinën e Presidencës, Nagavci: Kërkuam kujdes për të shmangur ngutia

Në prag të skadimit të afatit kushtetues për dekretimin e Ligjit për Gjykatën Speciale, shefja e Grupit Parlamentar të Lëvizjes Vetëvendosje, Arbërie Nagavci, ka theksuar se subjekti i tyre ka kërkuar vazhdimisht që të mos ketë veprime të ngutshme në këtë çështje kaq të ndjeshme. Duke folur para mbajtjes së seancës plenare, ajo u shpreh se situata e krijuar është dëshmi se si keqpërdorimi i temave me interes strategjik për agjenda partiake prodhon ngërçe të tilla. “Është e rëndësishme të përmendet edhe njëherë fakti që pikërisht për të shmangur situata të tilla, ne kemi insistuar që të mos ngutemi në procedimin e këtij ligji kaq të rëndësishëm dhe ndoshta, për fat të keq, është një shembull se si kur temat të cilat janë me interes shtetëror e strategjik përdoren për përfitime partiake, na sjellin situata të tilla”, deklaroi ajo. Gjatë prononcimit të saj, ajo solli në vëmendje edhe precedentët e kaluar institucionalë, duke përmendur ish-presidenten Vjosa Osmani, e cila kishte kthyer mbrapsht dy akte ligjore të miratuara më parë në Kuvend. “Duhet pasur parasysh edhe faktin që tashmë ka praktikë, domethënë gjatë legjislaturës së kaluar, në kohën sa ishte presidente zonja Vjosa Osmani, ajo kishte kthyer dy prej ligjeve të cilat kishin kaluar në Kuvend, dhe me sa jam në njohuri, të dyja ato ligje domethënë akoma nuk janë miratuar, janë kthyer në pikën zero”, u shpreh ajo. Sa i përket vendimmarrjes aktuale, Nagavci shprehu besimin se Presidentja Justina Shiroka-Pula do t'i kushtojë vëmendjen e merituar këtij projektligji. “Ka pasur raportime në media, besoj që presidentja, meqenëse edhe ka qenë fillimi i mandatit të saj edhe konsolidimi i ekipit edhe të tjerat, siç e tash, e shqyrton me kujdes që e meriton këtë temë dhe ky projektligj edhe të merr vendimin e duhur”, tha ajo. Kujtojmë se Ligji për Dhomat e Specializuara i është dorëzuar zyrtarisht presidentes Justina Shiroka-Pula më 15 tetor. Sipas përcaktimeve të nenit 80 të Kushtetutës së Republikës së Kosovës, e para e vendit disponon një afat prej 8 ditësh për të marrë vendim: ose ta shpallë ligjin, ose ta kthejë atë sërish në Kuvend për rishqyrtim. Në rast se nuk ndërmerret asnjë veprim brenda këtij afati ligjor, atëherë akti konsiderohet i shpallur zyrtarisht edhe pa pasur nevojën e nënshkrimit të presidentes.