Tragjedia familjare për prona në Klinë: Zyrtarizohet aktakuza ndaj Jetmir Isufit për vrasjen e vëllait

Prokuroria Themelore në Pejë ka përmbyllur hetimet dhe ka ngritur zyrtarisht aktakuzë ndaj të pandehurit Jetmir Isufi, i cili ngarkohet me veprat penale të vrasjes së rëndë dhe posedimit të paautorizuar të armëve. Sipas dosjes së prokurorisë, ngjarja e rëndë që tronditi opinionin publik ka ndodhur më 21 mars 2026, rreth orës 15:00, në fshatin Bokshiq të komunës së Klinës. Krimi dyshohet se erdhi si pasojë e një mosmarrëveshjeje për çështje pronësore midis viktimës dhe babait të tyre. Në bazë të aktakuzës, pas përplasjes verbale, i pandehuri ka hyrë brenda shtëpisë, ka marrë një armë zjarri dhe ka shtënë katër herë në drejtim të vëllait të tij, Faruk Isufi. Nga goditjet e marra, veçanërisht nga dëmtimi i arteries në këmbën e majtë, viktima pësoi gjakderdhje të madhe të brendshme dhe të jashtme. Edhe pse u transportua për ndihmë mjekësore, Faruk Isufi ndërroi jetë në Spitalin Rajonal të Pejës. Gjithashtu, organet e drejtësisë e ngarkojnë të pandehurin edhe me mbajtjen pa leje të armatimit, pasi në posedim të tij u gjet një pistoletë e kalibrit 9×19 mm, një karikator si dhe dhjetë fishekë të të njëjtit kalibër.