Lëndimi i Bukayo Sakas alarmon Arsenalin: Arteta shpreh frikën pas sfidës dramatike me Bayernin

Një re e zezë ka mbuluar kampin e Arsenalit pas barazimit spektakolar 2-2 përballë Bayern Munichut në kuadër të Ligës së Kampionëve. Ylli i skuadrës londineze, Bukayo Saka, u detyrua të braktisë fushën e lojës pas vetëm dhjetë minutash sfidë për shkak të një dëmtimi në kofshë. Në deklaratën e dhënë pas meçit të zhvilluar në "Allianz Arena", timonieri i 'Topçinjve', Mikel Arteta, nuk e fshehu shqetësimin e tij të madh për gjendjen e 24-vjeçarit. Tekniku spanjoll nërmori se duhet pritur ekzaminimi i detajuar nga departamenti mjekësor. “Nuk duket aspak mirë, por duhet të presim dhe të shohim. Stafi mjekësor është paksa i shqetësuar. Kur një lojtar detyrohet të largohet nga fusha për shkak të një dhimbjeje shumë të fortë, kjo nuk është kurrë një shenjë e mirë”, deklaroi Arteta. Lidhur me rrjedhën e ndeshjes, Eberechi Eze, i cili u inkuadrua pikërisht në vend të Sakas së lënduar, kaloi Arsenalin në epërsi. Megjithatë, gjiganti bavarez u rikthye fuqishëm me protagonist Harry Kane. Sulmuesi anglez fillimisht asistoi te goli i Alphonso Davies dhe më pas përmbysi shifrat duke shënuar nga pika e bardhë. Për t'i siguruar një pikë mjaft të vlefshme anglezëve u kujdes Declan Rice, i cili realizoi golin e barazimit në minutën e 82-të. Pasi përfundoi përballja, mesfushori Rice pati fjalë të mëdha për bashkëkombësin e tij, Kane, duke e vlerësuar si pretendentin kryesor për ta fituar 'Topin e Artë'. “Ai është fituesi i qartë. Statistikat e tij flasin vetë. Viti që ka pasur ka qenë i jashtëzakonshëm. Kur luan me të, e kupton se sa i mirë është, ndërsa kur luan kundër tij, e sheh se sa i vështirë është për t’u përballur. Ai është i jashtëzakonshëm dhe një lojtar fantastik. Jam me fat që mund të luaj me të, por jo edhe aq me fat kur më duhet të luaj kundër tij”, u shpreh Rice. Humbja potenciale e Sakas përbën një goditje të rëndë për synimet e Arsenalit, marrë parasysh fillimin e tij mjaft mbresëlënës të këtij edicioni, ku ka realizuar katër gola në 10 paraqitje në të gjitha kompeticionet, krahas një asistimi në elitën e futbollit evropian. Gjithsesi, anësori anglez po përballet vazhdimisht me telashe fizike në vitet e fundit. Gjatë edicionit të kaluar, ai luajti me dhimbje për shkak të një shqetësimi në tendinën e Akilit dhe më pas pësoi dëmtime muskulore në kofshë, çka bëri që të humbiste 15 ndeshje zyrtare. Ndërkaq, një sezon më parë, prapaskenat e lëndimeve e lanë atë jashtë fushave për 25 përballje.