Jakup Krasniqi refuzon shërbimet mjekësore në Hagë: Si të pranoj kujdesin e atyre që më tradhtuan?

Ish-kryetari i Kuvendit të Kosovës, Jakup Krasniqi, ka marrë vendimin për të mos pranuar më asnjë lloj kontrolli apo kujdesi mjekësor brenda qendrës së paraburgimit në Hagë. Lajmi është bërë i ditur nga vajza e tij, Gresë Krasniqi, vetëm një muaj pas shpalljes së vendimit të Dhomave të Specializuara, që e dënoi atë me 25 vite burgim. Në një rrëfim prekës, Gresa ka treguar detajet e bisedës telefonike me të atin. Sipas saj, Krasniqi e ka njoftuar se i ka refuzuar mjekët që kishin shkuar për ta kontrolluar, duke argumentuar se pas gjashtë vitesh privim nga liria dhe mohim të të drejtave themelore njerëzore, ai nuk dëshiron të përfitojë nga asnjë shërbim i institucionit që e mban padrejtësisht. Krasniqi, i cili u arrestua më 4 nëntor 2020 pas një operacioni të gjatë policor në banesën e tij në Prishtinë, po përballet me një gjendje të rënduar emocionale. E bija shprehet se ndihet e pafuqishme për ta detyruar të atin të ndryshojë qëndrim, duke pasur parasysh sakrificat e tij jetësore dhe faktin se ky dënim e çon totalin e viteve të kaluara në burgje në mbi 35 vjet. Historiku i Jakup Krasniqit me burgosjet është i gjatë. Përveç dënimit aktual, ai kishte vuajtur mbi 10 vjet burgim gjatë regjimit jugosllav, pasi ishte dënuar fillimisht në vitin 1981 për shkak të bindjeve të tij atdhetare. Gresa thekson se për babanë e saj, ky dënim i Hagës nuk është thjesht një gabim gjyqësor, por një padrejtësi e thellë, duke shtuar se është e vështirë t'i kërkosh atij të mirëpresë kujdesin e atyre që ai i ndien si tradhtarë të drejtësisë. Në mesazhin e saj, ajo rrëfen se përballë kësaj situate ka mundur t'i thotë vetëm fjalë mbështetëse, duke e inkurajuar të qëndrojë i fortë. “Dënimi i Babit nuk është një gabim që pret të korrigjohet. Është një padrejtësi!”, ka përfunduar ajo shkrimin e saj. Kujtojmë se më 16 shtator, trupi gjykues në Hagë dha verdiktin për krerët e UÇK-së, ku Jakup Krasniqi dhe Hashim Thaçi u dënuan me nga 25 vite burg, Kadri Veseli me 18, ndërsa Rexhep Selimi me 13 vite. Ndonëse u shpallën të pafajshëm për krime kundër njerëzimit, ata u dënuan për akuza të tjera, vendim të cilin mbrojtja e Krasniqit ka paralajmëruar se do ta ankimojë në shkallët e mëtejshme të drejtësisë.