Senatorja amerikane reagon për protestat në Shqipëri: Qeveria të mbrojë qytetarët nga dhuna policore

Elissa Slotkin kërkon respektimin e së drejtës për protesta paqësore, luftimin e korrupsionit dhe llogaridhënie nga zyrtarët e zgjedhur, ndërsa u bën thirrje palëve të ulin tensionet. Senatorja amerikane Elissa Slotkin ka reaguar lidhur me protestat dhe situatën e tensionuar në Shqipëri, duke i bërë thirrje qeverisë shqiptare të mbrojë qytetarët nga përdorimi i tepruar i forcës policore, të luftojë korrupsionin dhe t’u përgjigjet shqetësimeve të tyre. Në një mesazh të publikuar në rrjetin social X, Slotkin shprehu shqetësimin për përshkallëzimin e dhunës, duke theksuar se qytetarët kanë të drejtë të protestojnë në mënyrë paqësore dhe të kërkojnë llogari nga përfaqësuesit e tyre të zgjedhur. “Populli shqiptar ka të drejtë të protestojë në mënyrë paqësore dhe t’u kërkojë llogari zyrtarëve të zgjedhur prej tij”, theksoi senatorja amerikane. Slotkin bëri të ditur se gjatë ditëve të fundit kishte marrë telefonata të shumta nga qytetarë të shqetësuar të Michiganit, të cilët kishin ngritur shqetësime për situatën në Shqipëri, si dhe për zhvillimet në vende të tjera evropiane. Ajo nënvizoi se qeveria shqiptare ka përgjegjësi të respektojë shtetin e së drejtës, të garantojë sigurinë e protestuesve dhe të parandalojë përdorimin e tepruar të forcës nga policia. Po ashtu, kërkoi angazhim në luftën kundër korrupsionit dhe trajtimin serioz të shqetësimeve të qytetarëve. Në fund të reagimit, senatorja amerikane u bëri thirrje të gjitha palëve të shmangin përshkallëzimin e mëtejshëm të situatës dhe të angazhohen për një zgjidhje paqësore. “U bëj thirrje të dyja palëve të bëjnë gjithçka që munden për të ulur tensionet dhe për të gjetur një rrugë paqësore për të ecur përpara”,deklaroi Slotkin.