Trepça shkëlqen në Mitrovicë, Bashkimi ndalet në udhëtim në FIBA Europe Cup

Skuadra e Trepçës ka vazhduar formën e lartë në FIBA Europe Cup, duke regjistruar fitoren e dytë radhazi përballë ekipit çek, Opava. Në palestrën e mbushur në Mitrovicë, vendasit triumfuan me rezultatin 89-80, në një ndeshje ku treguan karakter dhe vendosmëri. Takimi nisi me ritëm të barabartë, ku mitrovicasit e mbyllën çerekun e parë me një epërsi minimale prej 17-16. Ndonëse Opava arriti të përmbyste shifrat në periudhën e dytë duke e fituar atë 23-21, lojtarët e Trepçës u rikthyen fuqishëm pas pushimit. Me një dominim në pjesën e dytë (27-22 dhe 22-19), “Minatorët” vulosën fitoren e rëndësishme prej nëntë pikësh. Jacori Payne dhe Shawn Jones udhëhoqën sulmin e mitrovicasve me nga 19 pikë secili, ndërsa James Graham shkëlqeu me 14 pikë, duke realizuar katër treshe nga pesë tentativa. Te mysafirët, më efikasi ishte Jakub Slavik me 15 pikë të shënuara. Pas këtij triumfi, Trepça numëron dy fitore dhe një humbje, duke u pozicionuar e treta në grup, ndërsa në sfidën e ardhshme do të udhëtojë drejt Gjeorgjisë për t'u përballur me Batumin. Në anën tjetër, Bashkimi i Prizrenit nuk ia doli të triumfojë në udhëtim ndaj estonezëve të Bigbank Kalev, duke u mposhtur me rezultat 88-84. Ndeshja ishte tejet e luftuar deri në sekondat e fundit, por vendasit arritën ta administrojnë epërsinë me më shumë gjakftohtësi. Pjesa e parë ishte e balancuar, me Kalev që fitoi çerekun e parë 20-19, ndërsa prizrenasit u kundërpërgjigjën në të dytin (21-19), duke shkuar në pushim me avantazh të lehtë. Megjithatë, epërsia e estonezëve u kristalizua në çerekun e tretë (28-24) dhe u mbajt deri në fund, pavarësisht përpjekjeve të Bashkimit për të rikthyer rezultatin. Lejson Zeqiri ishte lojtari më i dalluar për Bashkimin me 23 pikë, i ndjekur nga Divine Myles (20 pikë), Shannon Shorter (15 pikë) dhe Adrio Bailey (10 pikë). Te Kalev, Hugo Toom shënoi 22 pikë, ndërsa Damian Forrest dhe Kevaughn Allen kontribuan me nga 15 pikë secili. Pas kësaj humbjeje, Bashkimi mbetet me bilanc prej një fitoreje dhe një humbjeje, ndërsa në sfidën e ardhshme evropiane do të presë ekipin francez, Elan Chalon.