Kurti nga Mali i Zi: Serbia duhet të zhbllokojë zbatimin e marrëveshjeve për diplomat

Kryeministri i Republikës së Kosovës, Albin Kurti, ka kërkuar angazhim konkret nga të gjitha shtetet pjesëmarrëse në Procesin e Berlinit për implementimin e marrëveshjeve të arritura, duke vënë theksin te nevoja që Serbia t’i përmbahet zotimeve për njohjen e diplomave. Këto komente kreu i ekzekutivit kosovar i bëri nga Shën Stefani i Malit të Zi, ku po merr pjesë në Samitin e Procesit të Berlinit, i cili po zhvillohet këtë 22 tetor. Në një reagim të publikuar në rrjetet sociale, Kurti theksoi se Kosova ka përmbushur çdo obligim që i takon, duke përfshirë ratifikimin e të gjitha marrëveshjeve të procesit në Kuvendin e Kosovës. “Kosova i ka ratifikuar të gjitha marrëveshjet, përfshirë atë për njohjen e diplomave, dhe kërkojmë që ato të zbatohen nga të gjithë, përfshirë këtu edhe fqinjin tonë verior, Serbinë”, deklaroi Kurti. Ky qëndrim u artikulua pas një takimi bilateral me Komisioneren Evropiane për Zgjerim, Marta Kos, ku u diskutua edhe për rrugën e Kosovës drejt integrimit evropian. Me këtë rast, Kurti i kërkoi mbështetjen e Brukselit për avancimin e statusit të vendit si kandidat për anëtarësim në Bashkimin Evropian. Kujtojmë se marrëveshja për njohjen e kualifikimeve të arsimit të lartë, së bashku me lëvizjen e lirë me letërnjoftim dhe njohjen e kualifikimeve profesionale për mjekët, dentistët e arkitektët, u nënshkrua më 3 nëntor 2022. Ndonëse Kuvendi i Kosovës i ratifikoi ato në shkurt të vitit 2023, dhe Serbia bëri të njëjtën gjë në prill të po atij viti, zbatimi praktik mbetet sfidë. Çështja e diplomave mes Prishtinës dhe Beogradit ka një histori të gjatë bllokimesh. Pavarësisht marrëveshjeve të arritura në kuadër të dialogut të ndërmjetësuar nga Brukseli në vitet 2011 dhe 2016, procesi i certifikimit të diplomave ka mbetur peng i moszbatimit në terren, duke lënë qindra qytetarë në pritje të zgjidhjes së këtij problemi.