Lajm i mirë nga Vatikani: Papa Leo e ka kaluar rrezikun, nuk kërkohet trajtim i mëtejshëm pas operacionit

Pas ndërhyrjes kirurgjikale të kryer javën e kaluar për shkak të një tumori në mushkëri, mjekët kanë konfirmuar se Papa Leo nuk do të ketë nevojë për terapi shtesë. Sipas njoftimit zyrtar të bërë të mërkurën, analizat kanë treguar se sëmundja nuk është përhapur në pjesë të tjera të trupit. Ndërkohë, mbetet ende për t'u konfirmuar nëse Ati i Shenjtë do të jetë në gjendje të realizojë vizitën e planifikuar në Uruguai, Argjentinë dhe Peru, e cila është parashikuar të zhvillohet nga data 6 deri më 17 nëntor. Kujtojmë se Papa 71-vjeçar iu nënshtrua operacionit më 13 tetor, ku iu hoq lobi i poshtëm i mushkërisë së djathtë. Pas ekzaminimeve të hollësishme dhe analizave të biologjisë molekulare mbi indet e operuara, u konfirmua se bëhej fjalë për adenokarcinomë, formën më të shpeshtë të kancerit të mushkërive, por fatmirësisht e lokalizuar, siç bëhet e ditur në deklaratën e publikuar nga Vatikani. Pas daljes nga spitali të shtunën e kaluar, Papa Leo ka nisur gradualisht rikthimin në angazhimet e tij zyrtare. Këtë të mërkurë, ai u shfaq sërish në Sheshin e Shën Pjetrit për të zhvilluar audiencën e përjavshme me besimtarët dhe pelegrinët.