Samiti i Berlinit: Kryeministri Kurti takon Marta Kos, kërkon lëvizje të shpejta drejt integrimit evropian

Kryeministri i Kosovës, Albin Kurti, ka zhvilluar një takim me Komisioneren Evropiane për Zgjerim, Marta Kos, në kuadër të Samitit të Procesit të Berlinit që po mbahet në Shën Stefan të Malit të Zi. Përmes një publikimi në rrjetet sociale, kreu i ekzekutivit kosovar ka bërë të ditur se në fokus të bisedës kanë qenë agjenda e reformave, rrugëtimi evropian i vendit dhe domosdoshmëria e veprimeve të prekshme për anëtarësimin në Bashkimin Evropian. “Me institucione plotësisht funksionale Kosova do t’i përshpejtojë reformat”, ka shkruar Kurti, duke vënë në pah angazhimin e institucioneve vendore. Ai gjithashtu ka përmendur miratimin e ligjit të fundit për anëtarësimin në Zonën Unike të Pagesave në Euro (SEPA), duke theksuar se ky hap do t'i sigurojë një kursim vjetor prej rreth 58 milionë eurosh qytetarëve, sipërmarrjeve dhe diasporës, ndërsa ka paralajmëruar nisjen e shpejtë të bisedimeve për nismën “Roam like at Home” për eliminimin e tarifave shtesë të roamingut. Gjatë bashkëbisedimit, shefi i qeverisë ka kërkuar që arritjet demokratike të Kosovës, orientimi i qartë drejt vlerave evropiane dhe përafrimi i plotë me Politikën e Përbashkët të Jashtme dhe të Sigurisë të BE-së të gjejnë pasqyrim në vendimmarrje konkrete nga ana e strukturave të Bashkimit Evropian. “Përparimi ynë demokratik, përkushtimi ndaj vlerave të përbashkëta dhe linjëzimi me Politikën e Përbashkët të Jashtme dhe të Sigurisë së BE-së duhet të reflektohen në hapa konkretë. Është e rëndësishme dhe e nevojshme, mbështetja proaktive e Komisionit për statusin e vendit kandidat dhe hapjen e negociatave për anëtarësim”, ka theksuar kryeministri Kurti. Në këtë linjë, ai ka ndalur edhe te zbatimi i dakordimeve që dalin nga Procesi i Berlinit, duke kërkuar nga të gjitha palët, e në veçanti nga Serbia, respektimin dhe ratifikimin e plotë të tyre, përfshirë marrëveshjen për njohjen e ndërsjellë të diplomave.