Arrestimi i Vlora Hysenit, Rama: Masë ekstreme, drejtësia të zbardhë të vërtetën deri në fund

Kryeministri i vendit, Edi Rama, ka dalë në një reagim publik lidhur me ngjarjet e bujshme pas ndalimit të ish-kryetares së Shërbimit Informativ Shtetëror, Vlora Hyseni, duke e cilësuar këtë zhvillim si një situatë që kërkon vëmendje dhe veprim urgjent. "Vendosa të flas në këtë konferencë, sepse zhvillimet e fundit rreth arrestit të ish-drejtueses së SHISH kërkonin një sqarim. Bëhet fjalë për një masë ekstreme, por unë nuk kam tagrin të gjykoj arsyet pse Prokuroria ka ndërmarrë këtë hap. Nuk e kam bërë dhe nuk do të ndërhyj kurrë në punët e drejtësisë. Çdo akuzë duhet të hetohet me imtësi deri në fund," u shpreh ai. Sipas kreut të qeverisë, respektimi i pavarësisë së sistemit të drejtësisë nuk nënkupton miratim me heshtje. Përtej aspektit penal personal, ai theksoi se ekziston një parim madhor shtetëror që nuk mund të anashkalohet sikur të mos kishte ndodhur asgjë. "Nuk është ngjarja e parë në botë që një drejtues i shërbimit sekret përballet me ligjin, por është rasti i parë që vetë institucioni i inteligjencës kthehet në objekt të spekulimeve mediatike kombëtare dhe ndërkombëtare, për shkak të mosmarrjes në kohë të masave që shtetet zakonisht aplikojnë. Hetimi dhe gjykimi i Vlora Hysenit i takojnë ekskluzivisht organeve të drejtësisë," shtoi kryeministri. Në fjalën e tij, Rama vuri theksin te nevoja e mbrojtjes së institucioneve kyçe: "Ruajtja e SHISH-it dhe e strukturave të tjera nga dëmet e panevojshme kolaterale është detyrim shtetëror. Parimi i ndarjes së pushteteve nuk nënkurpton shkëputje nga përgjegjësia dhe mbikëqyrja institucionale. Kjo situatë kërkon një trajtim serioz dhe të përbashkët. Besoj se mbledhja e Këshillit të Sigurisë, e thirrur për nesër, është hapësira e duhur për të analizuar dhe reflektuar mbi përgjegjësitë tona institucionale."