Mashtroi qytetarët duke u hequr si agjent i AKI-së për punësime, vihet në pranga i dyshuari

Policia e Kosovës ka vënë në pranga një person, i cili dyshohet se përmes mashtrimit është prezantuar në mënyrë të rreme si zyrtar i Agjencisë së Kosovës për Inteligjencë. Ky aksion është finalizuar pas hetimeve intensive të zhvilluara në bashkëpunim të ngushtë me AKI-në dhe Prokurorinë Themelore në Prishtinë, lidhur me një rast të denoncuar gjatë muajit tetor të këtij viti. Sipas njoftimit zyrtar, i dyshuari me inicialet D.N. është arrestuar sot, pasi ekzistojnë dyshimet e bazuar se që nga fillimi i vitit 2025 e deri në momentin e raportimit të rastit, ai është hequr si punonjës i sigurisë shtetërore. Duke shfrytëzuar këtë identitet të rremë, ai u ka marrë shuma të ndryshme parash qytetarëve, duke u premtuar atyre punësim brenda këtij institucioni shtetëror. Pas ndalimit, prokurori kujdestar i Shtetit ka lëshuar urdhër për dërgimin e të dyshuarit në mbajtje për 48 orë, kohë gjatë së cilës do të ndërmerren veprimet e mëtejshme proceduriale ligjore. "Policia e Kosovës, në bashkëpunim të ngushtë me institucionet përkatëse, mbetet e përkushtuar në parandalimin dhe hetimin e veprave penale, si dhe në mbrojtjen e qytetarëve nga mashtrimet dhe keqpërdorimi i besimit të tyre", thuhet në komunikatën zyrtare. Autoritetet u bëjnë thirrje publike qytetarëve që të tregojnë vigjilencë të lartë ndaj personave që premtojnë punësim në institucionet publike kundrejt pagesave monetare, dhe njëkohësisht i inkurajojnë që çdo rast të tillë ta denoncojnë menjëherë pranë Policisë së Kosovës.