Nuk ka ndërmend të kthehet te Milan: Sulmuesi francez kërkon me ngulm qëndrimin te Leipzig

Përvoja e re në formë huazimi te Leipzig duket se i ka rikthyer formën ideale dhe qetësinë sulmuesit Christopher Nkunku, i cili prej kohësh ishte larguar nga planet e Milanit. Sulmuesi nga Franca ka treguar një paraqitje fantastike në fushën e blertë, duke realizuar 4 gola dhe duke dhënë 2 asiste në vetëm tetë takime zyrtare me fanellën e skuadrës gjermane. Në një prononcim të dhënë së fundmi për prestigjiozen “Sport Bild”, Nkunku ka shprehur hapur dëshirën e tij për të vazhduar aventurën me klubin gjerman edhe pas përfundimit të këtij edicioni, ndonëse fati i tij mbetet në duart e dy drejtorive pas përfundimit të huazimit. “Jam jashtëzakonisht i lumtur këtu në Leipzig. I njoh mirë qytetin dhe klubin, ndërsa ndihem i vlerësuar dhe rehat me çdo gjë dhe këdo rreth meje”, u shpreh fillimisht sulmuesi. Më tej, ai shtoi se ky mjedis mbetet i veçantë për të: “Ky është një vend i veçantë për mua, ku kam përjetuar çaste kulmore në karrierën dhe jetën time personale. Kam kaluar katër vite të mrekullueshme, mbështetja e tifozëve është e jashtëzakonshme dhe atmosfera këtu ngjan me një familje të vërtetë, gjë që ka një peshë të madhe për mua.” Në lidhje me të ardhmen e tij në afatgjatë, Nkunku theksoi se gjithçka është në fazën e hershme: “Jemi ende në fillim të sezonit, por po të varet nga dëshira ime, do të qëndroja këtu për një kohë të gjatë. Megjithatë, në rrethana të tilla duhet një dakordësi mes dy klubeve, pasi vendimi nuk varet vetëm nga dëshira ime.”