Pakënaqësi dhe orë të tëra pritjeje në Cyrih: Problemet teknike përfshijnë kompaninë Chair Airlines

Për shkak të nisjes së pushimeve vjeshtore në disa kantone të Zvicrës, Aeroporti i Cyrihut është mbushur sërish me fluks të lartë udhëtarësh, duke sjellë edhe sfidat e para për pasagjerët. Mes udhëtarëve ishte edhe familja e Ardit T., bashkëshortja dhe dy fëmijët e të cilit kishin planifikuar të udhëtonin drejt Prishtinës me një fluturim të kompanisë Chair Airlines. Ndonëse nisja ishte caktuar për në orën 16:55, orari i fluturimit u shty në mënyrë të përsëritur. “Pasagjerët qëndruan për orë të tëra në portë dhe nuk morën informacion të qartë se përse kishte një vonesë kaq të madhe dhe kur do të nisej fluturimi”, u shpreh Arditi, duke shtuar se situata ka qenë tejet e rëndë, veçanërisht për familjet me fëmijë të vegjël, ndërsa as shërbimi ndaj klientit nuk ka mundur t'ju japë përgjigje konkrete. Lidhur me këtë situatë, nga ana e Chair Airlines është dhënë shpjegimi zyrtar se aeroplani i parashikuar për këtë fluturim nuk është vënë në punë për shkak të një defekti teknik të papritur. Zëdhënësi i kompanisë, Nicolas Bühler, ka konfirmuar se për këtë arsye është siguruar një avion zëvendësues, i cili ka bërë të mundur nisjen drejt kryeqytetit kosovar vetëm gjatë orëve të mbrëmjes. Duke shprehur mirëkuptim për shqetësimin e krijuar nga pritja e gjatë, kompania bëri të ditur se pasagjerëve u janë shpërndarë kupona për ushqim dhe pije brenda hapësirave të aeroportit. Njëkohësisht, Chair Airlines ka hedhur poshtë pretendimet e ngritura se udhëtarët kanë mbetur pa informacione në aeroport, duke theksuar se për ata është kujdesur vazhdimisht. “Na vjen shumë keq për shqetësimin e shkaktuar pasagjerëve tanë. Natyrisht, dëshirojmë që të gjithë t’i çojmë në destinacion në kohë”, deklaroi Bühler. Megjithatë, drejtuesit e kompanisë kanë theksuar se në rrethana kur një mjet fluturimi nuk mund të operojë për shkak të ngecjeve teknike, garantimi i sigurisë për udhëtarët mbetet gjithmonë prioriteti kryesor.