Habit kreu i La Ligës: Lamine Yamal jashtë garës për Topin e Artë, preferon dyshen Mbappé-Rodri

Presidenti i La Ligës, Javier Tebas, ka ngritur shumë pikëpyetje dhe debate me prononcimet e tij të fundit rreth çmimit prestigjioz "Topi i Artë", duke vendosur theksin te Kylian Mbappé dhe Rodri, ndërkohë që ka anashkaluar plotësisht mrekullinë e ri të Barcelonës, Lamine Yamal. Në një intervistë të gjerë për të përditshmen franceze “L’Équipe”, numri një i futbollit spanjoll ka trajtuar gjithashtu mosmarrëveshjet e gjata me drejtuesit e Real Madridit dhe ka lëshuar akuza të hapura ndaj kreut të shtëpisë botërore të futbollit, Gianni Infantino. Kjo dalje publike e Tebas ka rikthyer vëmendjen te tensionet dhe temat më të nxehta të sportit në kontinentin e vjetër, duke sjellë në pah qëndrime që premtojnë përplasje të reja në skenën e futbollit evropian. Megjithatë, momenti që ka ngjallur më shumë diskutim mbetet përzgjedhja e tij për pretendentët kryesorë të trofeut individual më të rëndësishëm në botë. Edhe pse adoleshenti Lamine Yamal po shkëlqen në skenën ndërkombëtare dhe konsiderohet gjerësisht si një nga talentet më të mëdhenj të brezit të tij, kreu i La Ligës nuk e përfshiu atë në listën e preferencave të tij. Në vend të anëtarit të skuadrës katalanase, Tebas ka preferuar të veçojë sulmuesin francez të Real Madridit, Kylian Mbappé, dhe mesfushorin spanjoll të Manchester City-t, Rodri. “Nëse Mbappé e fiton Topin e Artë, do ta ketë plotësisht të merituar, por shpresoj që Rodri ta përsërisë suksesin e tij”, u shpreh ndër të tjera drejtuesi i institucionit spanjoll, duke mos kursyer as elozhet për yllin e Los Blancos, të cilin e konsideron si një aset global për lojën. “Mbappé është një yll global, një futbollist i shkëlqyer që jep një kontribut shumë të rëndësishëm për skuadrën e tij dhe për kampionatin në përgjithësi”, shtoi ai, duke shmangur çdo koment specifik për formën marramendëse të Yamalit, pavarësisht se mungesa e përmendjes së tij u duk hapur. Në të njëjtën intervistë, Tebas u detyrua të sqarojë edhe polemikat rreth përplasjeve të tij të vazhdueshme me Real Madridin, pas akuzave se kishte barazuar strategjinë mediatike të klubit me propagandën naziste, çka kishte vënë në lëvizje Këshillin e Lartë të Sportit në Spanjë për të shqyrtuar një hetim të mundshëm. Duke folur për radion spanjolle “Cadena SER”, ai hodhi poshtë çdo aludim se ka fyer klubin ose krerët e tij në këtë mënyrë: “Në fakt, nuk e kam quajtur askënd nazist. Po flisja thjesht për një strategji komunikimi”, u mbrojt ai, duke tentuar të qetësojë ujërat e trazuara të marrëdhënieve institucionale. Kriza mes dy palëve mbetet e thellë, e ushqyer vazhdimisht nga mospajtimet e thella mbi modelet e qeverisjes, formatin e garave dhe drejtimin e përgjithshëm të futbollit spanjoll. Në mbyllje të prononcimit të tij, Javier Tebas nuk i kurseu kritikat e ashpra as ndaj presidentit të FIFA-s, Gianni Infantino, duke theksuar se qëndrimi i tij ndaj kreut të organizatës botërore ka mbetur i pandryshuar për një dekadë të tërë. “E kam kundërshtuar prej dhjetë vjetësh dhe nuk e kam ndryshuar mendimin tim. Zhvillimet e fundit vetëm sa e forcojnë qëndrimin tim”, u shpreh ai, duke e akuzuar Infantinon për marrjen e vendimeve kokë më vete, në mungesë të një dialogu të mirëfilltë dhe konsultimi me federatat dhe palët e interesuara në futboll.