Abdixhiku: Kosova ka nevojë për një zgjidhje – propozojmë Qeveri Nacionale të Tranzicionit

Publikuar më: Kryetari i Lidhjes Demokratike të Kosovës (LDK), Lumir Abdixhiku, ka reaguar lidhur me situatën e zgjatur politike në vend, duke theksuar se Kosova gjendet në një krizë të thellë institucionale dhe sociale, tre muaj pas zgjedhjeve dhe ende pa Parlament e Qeveri funksionale. Ai ka kritikuar përsëritjen e 15 seancave parlamentare pa rezultat, duke vënë në pah frustrimin e qytetarëve dhe mungesën e shumicës parlamentare si ndër pengesat kryesore për formimin e institucioneve. Në këtë situatë, LDK-ja ka propozuar një Qeveri Nacionale të Tranzicionit, me mandat të kufizuar dhe me detyra të përbashkëta, që do të qeveriste deri në zgjedhjen e Presidentit dhe do të adresonte menjëherë problemet urgjente të qytetarëve. Abdixhiku ka nënvizuar se propozimi i LDK-së nuk ka për qëllim ndarjen e pushtetit, por zgjidhjen e nyjës së krizës dhe mbrojtjen e shtetit nga paraliza institucionale. Ai ka shprehur gatishmërinë për pjesëmarrje në çdo iniciativë që synon tejkalimin e gjendjes aktuale, përfshirë edhe takimin e ftuar nga Presidentja, por ka theksuar se nevojiten ide të reja për të dalë nga bllokada politike.