Parandalohet një tragjedi e mundshme: Policia polake prangos 16-vjeçarin që dyshohet se përgatiste sulm të armatosur

Autoritetet policore në kryeqytetin e Polonisë, Varshavë, kanë ndaluar një 16-vjeçar, i cili dyshohet fuqimisht se po planifikonte një sulm me përmasa të mëdha. Sipas grupit hetimor, i mituri kishte nisur përgatitjet për të privuar nga jeta disa persona, ndërsa gjatë kontrollit të ushtruar në banesën e tij, forcat e rendit gjetën një sasi armësh dhe mjete të ndryshme të rrezikshme. “Gjatë ndërhyrjes, u konstatua se 16-vjeçari mbante veshur një jelek antiplumb dhe kishte në posedim një lëshues gazi. Në vendngjarje është kryer një inspektim i detajuar nga grupi hetimor, nën asistencën e një eksperti të kriminalistikës”, thuhet në njoftimin zyrtar të policisë, e cila konfirmoi edhe shoqërimin e të miturit. Më tej, zyrtarët policorë bënë të ditur se pas përfundimit të procedurave hetimore me praninë e tij, i dyshuari është dërguar para gjykatës kompetente për çështjet e familjes. Si masë paraprake, trupi gjykues ka vendosur që adoleshenti të mbahet për një periudhë tremujore në një qendër rajonale edukative për të mitur. “Gjithashtu, efektivët e policisë kanë dorëzuar në organet e drejtësisë të gjitha provat materiale të siguruara, me qëllim hapjen e procedurave shpjeguese dhe shqyrtimin e mundësisë për caktimin e masave të mëtejshme të izolimit ndaj të miturit”, thuhet në fund të deklaratës së autoriteteve.