Seria fantastike e Spanjës vazhdon, De La Fuente tregon çelësin e suksesit pas triumfit ndaj Anglisë

Kombëtarja e Spanjës ka vazhduar të ngjisë shkallët e historisë, pasi ka triumfuar ndaj Anglisë me rezultatin 3-2 në një përballje madhështore të zhvilluar në “Wembley”, duke çuar në 39 numrin e ndeshjeve radhazi pa pësuar humbje. Dueli në kryeqytetin anglez ka qenë i mbushur me kthesa të papritura dhe ritëm të lartë, por në fund ka qenë pikërisht formacioni i udhëhequr nga Luis de la Fuente që ka triumfuar në tokën angleze. Në përfundim të takimit, kreu i stafit teknik të Spanjës ka analizuar paraqitjen e skuadrës së tij, duke vënë theksin te karakteri dhe mentaliteti fitues i lojtarëve. “Patëm 6-7 minuta ku një superfuqi na bëri dëme. Në përgjithësi, besoj se ndeshja ishte nën kontroll. Në disa raste na kushtoi fakti që vrapuam pas shpinës së kundërshtarit”, u shpreh De la Fuente. Strategu spanjoll ka veçuar gjithashtu urinë për sukses dhe ambicien e pashtershme të grupit që drejton në fushën e blertë. “E gjithë kjo uri është meritë e futbollistëve. Janë ambiciozë dhe kanë dëshirë të përmirësohen. Kjo është meritë e këtij grupi, i cili ka treguar vlera përtej aspektit futbollistik. Janë vlera jetësore që i bashkohen talentit të madh futbollistik”. Arritja e 39 ndeshjeve pa e njohur shijen e disfatës përfaqëson një dëshmi të qartë të nivelit të lartë që ky brez po shfaq vazhdimisht. “Shifrat janë aty. Është shumë e vështirë të bësh atë që po bën kjo skuadër. Ndeshja e radhës do të jetë sikur të jetë e fundit. Ky është sekreti”, deklaroi trajneri spanjoll. Duke ndalur te faza e ndeshjes kur anglezët rihapën sfidën, ai ka përmendur shanset e pashfrytëzuara nga ekipi i tij. “Përmbysja nisi kur patëm tri raste të pastra dhe nuk i shënuam. E shihja skuadrën të aftë për të reaguar në çdo rrethanë. Jam i sigurt se edhe me rezultatin 3-1 do të kishim reaguar njësoj”. Gjatë prononcimit të tij, De la Fuente nuk ka kursyer as lavdëratat për sulmuesin Ferran Torres, duke e vlerësuar lart kontributin e dhënë për suksesin e përbashkët. “Hugo Sanchez ishte shënuesi më i mirë me golat e shënuar me prekjen e parë. Ferran është një goleador shumë i mirë. Jam i kënaqur me punën e tij dhe prej saj përfitoi më pas edhe Mikel Oyarzabal. Kjo është punë skuadre dhe kjo është forca që kemi”. Në mbyllje të konferencës, trajneri është pyetur rreth talentit të ri Lamine Yamal dhe qasjes së kombëtares ndaj yllit të Barcelonës. “Nuk e di se çfarë i kërkon Barcelona. Ne i kërkojmë të bëjë atë që i përshtatet më mirë stilit tonë të lojës. Është një mrekulli që është me ne”, përfundoi De la Fuente.