“Race for the Cure Kosova”: Albulena Haxhiu bën thirrje urgjente për kontrolle të hershme kundër kancerit të gjirit

Ushtruesja e detyrës së presidentes së Kosovës, Albulena Haxhiu, ka marrë pjesë këtë të shtunë në edicionin e sivjetmë të aktivitetit tradicional “Race for the Cure Kosova”. Gjatë kësaj ngjarjeje sensibilizuese, ajo ka përcjellë një mesazh të fortë për rëndësinë e diagnostikimit të hershëm në luftën kundër kancerit të gjirit. Gjatë fjalës së saj, Haxhiu theksoj se thirrja për vetëdijesim duhet domosdoshmërisht të shtrihet te çdo grua e cila nuk ka mundur të jetë e pranishme sot. Ajo veçanërisht u ndal te ato gra që shpesh neglizhojnë shëndetin e tyre për shkak të përkushtimit ndaj familjes, tek ato që ndiejnë frikë nga diagnoza apo që ende hasin në pengesa për të marrë shërbimet e duhura mjekësore. Në fund, Haxhiu u ka bërë thirrje publike të gjitha grave që të mos i ikin kontrolleve preventive, duke sugjeruar gjithashtu që ky mesazh të kthehet në një kulturë kujdesi të përbashkët, duke ua kujtuar kontrollin mjekësor nënave, motrave, bijave, shoqeve dhe kolegjeve të tyre.