Aleanca për Shqiptarët: Ministri Shasivari të sqarojë ndryshimin e qëndrimit për provimin e jurisprudencës në gjuhën shqipe

Ministri i Drejtësisë, Jeton Shasivari, ndodhet para një kërkese publike për të sqaruar se çfarë ka ndryshuar në qëndrimet e tij nga muaji shkurt e deri në tetor – Kushtetuta, ligjet apo bindjet e tij personale, thuhet në një reagim zyrtar të Aleancës për Shqiptarët. Sipas kësaj partie, në shkurt të këtij viti, kur mbante edhe statusin e profesorit universitar, Shasivari e konsideronte si shkelje të Kushtetutës dhe të ligjeve çdo refuzim që provimi i jurisprudencës të jepet në gjuhën shqipe. Ai argumentonte asokohe se thelbi i provimit është testimi i njohurive juridike dhe jo kontrollimi i njohurive të gjuhës maqedonase. Mirëpo, sot në cilësinë e ministrit të Drejtësisë, i njëjti person u paraqet studentëve një opsion me 12 lëndë në shqip dhe dy në maqedonisht, duke e cilësuar këtë si një sukses të arritur. Në reagim kujtohet se gjatë muajit maj koalicioni VLEN premtonte një zgjidhje rrënjësore, të plotë dhe afatgjatë. Megjithatë, pesë muaj më vonë, ministri i tyre doli me një ofertë të cunguar, e cila u hodh poshtë nga vetë studentët. Gjithashtu, si situatë ironike vlerësohet deklarata e Shasivarit se “Do të flitet shqip o taj”, ndërkohë që dokumenti i tij zyrtar parashikon që një segment i provimit të mbahet ende në gjuhën maqedonase. Nga kjo forcë politike theksohet se studentët nuk kanë kërkuar as parulla politike dhe as llogaritje matematikore me kalkulatorë, por vetëm të drejtën legjitime që provimin e jurisprudencës ta realizojnë plotësisht në gjuhën shqipe. Në fund, Shasivari ftohet të bëjë publike bazën ligjore mbi të cilën arsyeton kufizimin e dy lëndëve praktike. Shtrohet pyetja se nëse në muajin shkurt këtë të drejtë e shikonte si të sanksionuar qartë në Kushtetutë dhe ligj, pse sot po kërkon konsultime dhe interpretime të reja juridike? Sipas Aleancës për Shqiptarët, standardet e ligjit nuk përshtaten sipas karriges që mban dikush, ndërsa parimet e drejtësisë nuk mund të kenë një standard për profesorin Shasivari dhe një standard tjetër për ministrin Shasivari.