Operacioni “Këmbimi” në Fier: Kërcënuan një 28-vjeçar për borxh, vihet në pranga 34-vjeçari, shpallet në kërkim bashkëpunëtori

Policia e Fierit ka finalizuar me sukses operacionin e koduar “Këmbimi”, duke vënë në pranga një 34-vjeçar dhe duke shpallur në kërkim bashkëpunëtorin e jo, pasi dyshohet se kanë kanosur një qytetar për shlyerjen e një detyrimi financiar. Ndërhyrja e efektivëve erdhi pas kallëzimit të bërë nga viktima, një 28-vjeçar me banim në Itali. Në pranga ka rënë shtetasi F. S. (H.), 34 vjeç, ndërsa është shpallur në kërkim bashkëpunëtori i tij, shtetasi R. M. (F.), 37 vjeç, të dy banues në Vlorë dhe me precedentë të mëparshëm penalë. Sipas hetimeve të kryera nga Specialistët e Sektorit për Hetimin e Krimeve të Rënda, dy të dyshuarit kishin kërcënuar 28-vjeçarin me qëllim që t'u dorëzonte një shumë parash që ata pretendonin se ua kishte borxh. Për t'i shpëtuar presionit, i dëmtuari kishte udhëzuar vëllanë e tij që t'i dorëzonte 34-vjeçarit dy automjete në qytetin e Lushnjës, në formë kompensimi për borxhin e pretenduar. Gjatë këtij momenti, forcat e rendit kanë ndërhyrë duke kapur në flagrancë 34-vjeçarin. Gjatë kontrollit fizik të ushtruar ndaj të arrestuarit, shërbimet e policisë kanë gjetur dhe sekuestruar në cilësinë e provës materiale një armë neuroparalizuese, si dhe dy automjetet e marra nën presion. Të dyja makinat dhe pistoleta janë vënë nën sekuestro preventive. Aktualisht, autoritetet po vijojnë punën intensive për lokalizimin dhe kapjen e 37-vjeçarit të shpallur në kërkim, si dhe për zbardhjen e plotë të rrethanave të kësaj ngjarjeje. Materialet procedurale i kanë kaluar Prokurorisë për veprime të mëtejshme ligjore.