Aksioni policor në Zubin Potok për krime lufte, Beogradi e krahason me “hakmarrje” ndaj serbëve

Ndërhyrja e fundit e Policisë së Kosovës në Zubin Potok, ku u prangosën nëntë persona nën dyshimet për përfshirje në krime lufte, ka nxitur reagime të ashpra nga Beogradi zyrtar dhe Lista Serbe, të cilët kanë kërkuar garanci për të drejtat e të ndaluarve. Sipas Listës Serbe, operacioni i mëngjesit është cilësuar si “brutal”, duke aluduar se këto veprime kanë mbjellë frikë dhe ankth brenda popullsisë serbe që jeton në pjesën veriore të vendit. Në një komunikatë të shpërndarë në platformat sociale, kjo forcë politike theksoi se në aksion u angazhuan një numër i madh i zyrtarëve të armatosur të Policisë së Kosovës, duke ngritur akuza për dëmtime pronësore, dyer të thyera dhe presion psikologjik ndaj familjarëve. “Kjo nuk është një procedurë ligjore që respekton prezumimin e pafajësisë dhe të drejtën e mbrojtjes, por një akt hakmarrjeje dhe metodë e [kryeministrit të Kosovës, Albin] Kurtit për të përndjekur serbët. Është e qartë se serbët në Zubin Potok përgjatë muajve të fundit po përballen me një presion të rëndë që ngjan me një situatë pushtimi”, thuhet ndër të tjera në qëndrimin e Listës Serbe. Po ashtu, është bërë thirrje që të ndaluarve t'u sigurohet qasje e menjëhershme te mbrojtësit ligjorë dhe familjet e tyre, ndërkohë që është kërkuar prania dhe vëzhgimi i procesit nga misionet ndërkombëtare si KFOR-i dhe EULEX-i. Një kundërpërgjigje e ngjashme erdhi edhe nga e ashtuquajtura Zyra për Kosovë në kuadër të Qeverisë së Serbisë. Ky institucion shtetëror serb e ka vlerësuar aksionin në pesë fshatra të Zubin Potokut si një tentativë për “frikësim dhe dëbim” të popullsisë lokale, duke konfirmuar se të gjithë të arrestuarit i përkasin komunitetit serb. Zyra për Kosovë ka ngritur pretendime se në mesin e të ndaluarve ndodhet një i moshuar 90-vjeçar, si dhe një qytetar në familjen e të cilit kujdeset një fëmijë me aftësi të kufizuara. “Të arrestuarit përfshijnë edhe të afërm të serbëve që kanë qenë më parë në shënjestër të Prishtinës”, u shpreh zyra qeveritare serbe, duke shtuar se personat e ndaluar kanë banuar në Zubin Potok për më shumë se dy dekada. Nga kjo zyrë njoftuan se ekipet e tyre ndodhen në terren për të mbajtur lidhjen me familjarët e të arrestuarve dhe për t'u ofruar ndihmë juridike. Në anën tjetër, organet e rendit në Kosovë kanë konfirmuar se nëntë personat u vunë në pranga në kuadër të hetimeve intensive lidhur me veprën penale “krime lufte kundër popullatës civile”. Operacioni u ndërmor nga Policia e Kosovës në bashkëpunim të ngushtë me Prokurorinë Speciale.