Situatë alarmi në Francë: Vijohet me shtetrrethim, ndërsa SHBA dhe shtetet e botës lëshojnë thirrje urgjente për qytetarët

Përshkallëzimi i situatës në Francë ka shtyrë Ambasadën e Shteteve të Bashkuara në këtë vend që të lëshojë një thirrje urgjente për shtetasit e saj, duke i këshilluar ata që të distancohen menjëherë nga zonat e prekura prej protestave të dhunshme. Veprimi vjen pas shpërthimit të trazirave, valës së plaçkitjeve dhe ndërhyrjes së forcave të rendit me gaz lotsjellës, çka ka detyruar autoritetet vendase të vendosin orë policore në disa rajone të ndryshme. Kjo valë trazirash e ka zanafillën te protestat e 17 tetorit, të cilat degraduan në dhunë të hapur në disa qendra urbane franceze, ku përfshihen Parisi, Lioni dhe Lili. Përfaqësuesit e diplomacisë amerikane kanë bërë të ditur se kufizimet e pjesshme të qarkullimit janë tashmë realitet në disa qytete, ndërkohë që nuk përjashtohet mundësia e shtrëngimit të masave, pasi tubimet sporadike rrezikojnë të vazhdojnë. Në kryeqytetin francez, autoritetet kanë aktivizuar shtetrrethimin e natës në pika të caktuara, duke përfshirë hapësirat pranë sheshit Place de la République dhe zonën tregtare të njohur si Le Al. Gjatë përplasjeve, policia është detyruar të përdorë gaz lotsjellës për të shpërndarë turmat e protestuesve, ndërkohë që situata është rënduar edhe më shumë nga djegia e automjeteve dhe zjarret e ndezura në rrugë. Turistëve që ndodhen në Paris u është sugjeruar fuqimisht t'i shmangen lokacioneve ku shpesh organizohen tubime, të tilla si Place de la République, Place de la Bastille, Place de la Nation dhe Boulevard Voltaire. Për më tepër, vala e dhunës ka lënë gjurmë edhe në qytete të tjera, ku në Lyon është djegur zyra e turizmit në Place Belcourt, kurse në Limoges flakët kanë përfshirë ndërtesën historike të bashkisë. Ndërkohë, kryetari i bashkisë së Bordeaux ka bërë me dije se rreth 100 dyqane janë vënë shënjestër e plaçkitjeve gjatë këtyre demonstratave. Pavarësisht kësaj panorame të tensionuar, trafiku ajror drejt dhe nga Parisi po vijon kryesisht në kushte normale. Megjithatë, udhëtarët këshillohen të tregojnë kujdes duke verifikuar ndryshimet e mundshme në metro dhe transportin publik, të konfirmojnë oraret e fluturimeve drejtpërdrejt me kompanitë ajrore dhe të lënë kohë shtesë në dispozicion për mbërritjen në aeroport. Ambasada gjithashtu ka ftuar shtetasit amerikanë që të informohen vazhdimisht përmes mediave vendase dhe njoftimeve zyrtare lidhur me gjendjen e sigurisë dhe kufizimet e reja në lëvizje. Në një linjë me këto zhvillime, gjatë ditës së martë, një sërë shtetesh evropiane dhe aziatike kanë ndërmarrë hapa të ngjashëm, duke paralajmëruar qytetarët e tyre që jetojnë ose synojnë të udhëtojnë drejt Francës që të ruajnë vigjilencën ndaj rrezikut të protestave të dhunshme, duke rekomanduar shmangien e grumbullimeve dhe zbatimin e rreptë të udhëzimeve nga autoritetet vendase. Sipas informacioneve nga Ministria e Jashtme gjermane, përsëritja e trazirave mbetet një skenar shumë i mundshëm në ditët në vijim, ndaj u është bërë thirrje gjermanëve që të ndjekin me vëmendje urdhrat e policisë. Nga ana e saj, Italia u ka kërkuar qytetarëve të vet që të regjistrojnë qëndrimin në territorin francez përmes një platforme online ose aplikacioni për të lehtësuar lokalizimin e tyre në rast nevoje, ndërsa Republika Çeke ka sugjeruar shmangien e çdo lloj demonstrate, marshimi apo tubimi publik. Aksione të ngjashme paralajmëruese kanë ndërmarrë edhe Polonia e Holanda, të cilat u kanë sugjeruar udhëtarëve të mos afrohen në zonat e nxehta të protestave. Vende si Danimarka, Suedia, Finlanda dhe Norvegjia i janë bashkuar thirrjeve që qytetarët e tyre të mos marrin pjesë në demonstrata dhe të respektojnë protokollet e vendosura nga autoritetet lokale. Edhe shtetet e kontinentit aziatik nuk kanë mbetur pa reaguar. Ministria e Punëve e Jashtme e Kinës dhe misionet e saj diplomatike në Francë u kanë kërkuar shtetasve kinezë që të tregojnë kujdes maksimal, të ndërmarrin masa shtesë mbrojtëse dhe t'u largohen zonave të protestave. Ndërkaq, Ministria e Punëve e Jashtme e Malajzisë ka bërë të me dije se po ndjek nga afër zhvillimet në terren.