Totti zbulon pengun e madh në karrierë: Me Ronaldon do të kisha shënuar tri herë më shumë, por futbolli është Maradona

Francesco Totti ka ndarë disa rrëfime të sinqerta rreth karrierës së tij të lavdishme dhe pikëpamjeve për futbollin modern, në një intervistë të gjatë dhënë për të përditshmen italiane “Corriere dello Sport”, me rastin e 50-vjetorit të tij. Ikona e Romës nuk ka ngurruar të shprehë keqardhjen që nuk pati mundësi të ndante fushën me sulmuesin legjendar brazilian, Ronaldo “Fenomenin”. “Do të kisha dashur shumë të luaja me Ronaldon, ‘Fenomenin’. Mendoj se do ta kisha ndihmuar të shënonte tri herë më shumë gola. Por për mua, futbolli është Maradona: topi e ka emrin e tij të shkruar mbi vete; ai është ikona absolute. CR7 apo Messi? Ata janë dy ‘alienë’; është e vështirë madje të gjesh një mbiemër për ta. Do të kisha dashur të luaja me të dy,” u shpreh ish-kapiteni verdhekuq, duke prekur gjithashtu ndjenjat e tij lidhur me kalimin e viteve dhe largimin përfundimtar nga fusha e blertë. “A më rëndon ky moment historik? Herët a vonë, ai vjen… Jam i lumtur që gëzoj shëndet të mirë. Nëse ndalesh dhe mendon për të, është një shifër domethënëse. Dhe pastaj, kur nuk mund të bësh më atë që dashuron… Ndihesh i trazuar; do të jepja gjithçka për të mundur të luaja sërish,” pranoi Totti gjatë bisedës ku foli për çështje nga jeta personale tek ajo profesionale. Duke kaluar te situata aktuale e Romës, legjenda e klubit dha mendimin e tij për pankinën dhe çështjen e fanellës me numrin 10: “Gasperini është një nga trajnerët më të mirë në Serinë A. Ai e tregoi veten tek Atalanta dhe tani e ka situatën plotësisht nën kontroll; nëse i jepet liri e plotë veprimi, ka mundësi të shkëlqyera për të bërë mirë. A është gati Dybala për fanellën me numrin 10? Nuk mendoj se është një fanellë që jepet pas vetëm pesë apo gjashtë ndeshjeve të mira; kërkon një projekt afatgjatë… I takon klubit të vendosë nëse do t’ia japë apo jo.” Në fund, Totti bëri një rrëfim të papritur rreth prapaskenave të merkatos në të kaluarën e tij: “Nëse do të isha larguar nga Roma, do të kisha dashur të shkoja te Milani. Pjesërisht sepse i mbështesja që kur isha fëmijë. Epoka e Sakit dhe e holandezëve më magjepste: ishte një skuadër që fitonte gjithçka dhe ishte e mrekullueshme për t’u parë.”