Tragjedi në Australi: Deputetja Helen Haines humb të dyja këmbët pas një sulmi me makinë

Deputetja australiane Helen Haines ka pësuar një fatkeqësi të rëndë, pasi mjekët janë detyruar t'i amputojnë të dyja gjymtyrët e poshtme, pas një goditjeje të qëllimshme me automjet që tronditi opinionin publik. Lajmi është konfirmuar të mërkurën nga bashkëshorti i saj, Phil Haines, i cili tregoi se ligjvënësja e pavarur federale po vazhdon të qëndrojë e shtruar në spital dhe gjendja e saj shëndetësore paraqitet e qëndrueshme. Ngjarja e rëndë ndodhi pasditen e së hënës në një arterie kryesore afër zyrës elektorale të deputetes, e vendosur në Wangaratta, në pjesën verilindore të shtetit Victoria. Duke folur para mediave nga ambientet e spitalit “The Alfred” në Melburn, bashkëshorti i saj prej afro katër dekadash zbuloi se ekipet mjekësore kishin bërë përpjekje maksimale për të shpëtuar të paktën njërën nga këmbët e saj. “Këmba e majtë e Helenit u pre të hënën. Edhe pse kishim shpresa se e djatjta do t'ia dilte, kirurgët u detyruan të ndërhynin për ta amputuar përfundimisht edhe atë,” u shpreh ai, duke shtuar megjithatë se parametrat e saj jetësorë janë stabilizuar. “Pavarësisht gjithçkaje, zemra dhe mendja e saj vijojnë të jenë në gjendje të shkëlqyer,” theksoi bashkëshorti i saj. Në anën tjetër, autoritetet kanë vënë në pranga 43-vjeçarin Brendan Nugent, i cili u paraqit para trupit gjykues të mërkurën për t'u njohur me akuzat e rënda që rëndojnë mbi të, përfshirë drejtimin e rrezikshëm të mjetit me pasojë lëndime të rënda, shkaktim të paramenduar të lëndimeve trupore dhe sulm ndaj një zyrtari publik federal. Ky sulm i dyshuar ka ngritur alarmin në të gjithë Australinë, duke rikthyer në vëmendje shqetësimet rreth nivelit të sigurisë që gëzojnë figurat e larta politike. Policia e Victorias ka bërë të ditur se hetimet janë ende të hapur për të zbardhur plotësisht motivin e vërtetë të këtij incidenti. Komisioneri i Policisë së Victorias, Mike Bush, pranoi se institucionet nuk kishin të dhëna paraprake se i dyshuari përbënte një rrezik kaq ekstrem dhe të menjëhershëm. Pas kësaj ngjarjeje tronditëse, parlamentarët australianë u thirrën në një takim urgjent në Canberra për t'u njohur me masat e reja të sigurisë, ndërkohë që zyrtarët federalë kanë tërhequr vëmendjen mbi shtimin e dukshëm të kanosjeve dhe ngacmimeve ndaj politikanëve. Gjatë seancës dëgjimore në gjykatë, mbrojtësi ligjor i Nugent sqaroi se i pandehuri vuan nga një çrregullim i rrallë neurologjik dhe aktualisht nuk është duke marrë mjekimin e duhur. Ndërkohë që mbrojtja nuk ka kërkuar lirim me kusht për të dyshuarin, gjykata ka vendosur që seanca e radhës të mbahet më datë 4 shkurt.