Flick nuk dramatizon humbjen nga PSG-ja, zbulon arsyen e lodhjes dhe e veçon talentin e Barcelonës

Hansi Flick është përpjekur të nxjerrë anët pozitive nga humbja e Barcelonës ndaj Paris Saint-Germainit me rezultat 4-2, në një ndeshje ku katalunasit patën vështirësi për t’u përballur me fuqinë sulmuese të skuadrës së Luis Enriques. Trajneri gjerman pranoi se ekipi i tij bëri gabime, ndërsa lodhjen fizike e vlerësoi si një nga faktorët që ndikuan në paraqitjen e Barcelonës. Ai gjithashtu veçoi paraqitjen e talentit të ri, Xavi Espart, i cili shënoi një gol në këtë përballje. “Ishte një test i madh për ne dhe sot e pamë se në cilat fusha duhet të përmirësohemi. Gjithashtu, pashë edhe gjëra të mira”, deklaroi Flick në konferencën për shtyp. Tekniku i Barcelonës nuk i fshehu vështirësitë që kaloi skuadra e tij, veçanërisht në minutat e fundit, por theksoi se ndeshja nuk duhet të analizohet vetëm nga rezultati përfundimtar. “Besoj se ishte një ndeshje fantastike nga të dyja skuadrat. Bëmë gabime dhe humbëm topa, të cilat duhet t’i analizojmë. PSG-ja tregoi se ishte më e mirë se ne. Kemi humbur, por kemi mësuar shumë nga kjo ndeshje”, u shpreh ai. Flick e përmendi lodhjen e akumuluar gjatë javëve të fundit si një nga arsyet që ndikuan në paraqitjen e skuadrës. Ai rikujtoi se lojtarët kishin shpenzuar shumë energji në ndeshjet e fundit, ndërsa përgatitjet pas përballjes me Sevillan nuk kishin shkuar sipas planit, pasi ekipi kishte mbërritur një ditë më vonë për shkak të kushteve atmosferike. “Duhet ta kuptojmë se bën gabime kur nuk je i freskët. Ne nuk ishim të freskët”, tha trajneri gjerman. Megjithatë, ai vlerësoi mentalitetin dhe përkushtimin e futbollistëve të tij gjatë javëve të fundit. “Javët e fundit kanë qenë të jashtëzakonshme dhe e vlerësoj mentalitetin dhe qëndrimin e lojtarëve të mi. Sot kjo u vërejt”, shtoi Flick. Sipas tij, Barcelona pati momente të mira në presionin ndaj kundërshtarit, por nuk arriti ta ruante të njëjtin nivel gjatë gjithë takimit. “Pati gjëra fantastike, por ndodhi ajo që ndodhi pas ndeshjes me Sevillan dhe nuk patëm rikuperimin e nevojshëm. Kjo nuk është një justifikim, por një mënyrë për ta kuptuar pse sot nuk ishim në nivelin tonë më të mirë”, deklaroi ai. Pavarësisht humbjes, Flick nuk dëshiron të krijojë panik dhe rikujtoi se sezoni është ende i gjatë. “Në tetor nuk fitohen trofetë. Liga e Kampionëve vendoset në qershor”, theksoi trajneri i Barcelonës. Një pjesë e konferencës për shtyp iu kushtua edhe problemeve në repartin defensiv, pasi PSG-ja krijoi shumë raste dhe arriti t’i shfrytëzonte gabimet e Barcelonës, e cila pati vështirësi për t’i ndalur kundërsulmet e parisienëve. Flick pranoi se skuadra duhet ta analizojë paraqitjen e saj në mbrojtje, veçanërisht në fazën përfundimtare të ndeshjes. “Besoj se në minutat e fundit, pas golit për 3-2, skuadra u dorëzua paksa”, tha ai. Megjithatë, trajneri këmbënguli se duhen vlerësuar edhe aspektet pozitive të paraqitjes. “Duhet ta analizojmë ndeshjen, por pashë shumë gjëra të mira dhe gjëra që duhet t’i përmirësojmë. Nuk dua të jem negativ, jam pozitiv. Ishte një përvojë e mirë dhe duhet të analizojmë se çfarë mund të përmirësojmë”, deklaroi Flick. Ai veçoi edhe portierin Joan Garcia, i cili me disa ndërhyrje të rëndësishme e mbajti Barcelonën në lojë përballë rasteve të shumta të PSG-së. “PSG-ja pati shumë raste dhe Joan ishte fantastik”, vlerësoi trajneri. Në anën tjetër, Flick beson se Barcelona kishte mundësi të shënonte më shumë gola dhe të arrinte një rezultat tjetër. “Besoj se edhe ne patëm shumë raste dhe normalisht do t’i kishim shënuar ata gola”, u shpreh ai. Për të përmirësuar lojën, trajneri kërkoi më shumë qetësi, pozicionim më të mirë dhe koordinim mes reparteve. “Duhet të luajmë me qetësi, të pozicionohemi më mirë dhe të jemi të lidhur mirë mes vete. Duhet të kujdesemi që të mos krijojmë distanca kaq të mëdha mes nesh dhe të jemi më të qartë në atë që duam të bëjmë”, shtoi gjermani. Një nga futbollistët që mori vlerësime të veçanta nga trajneri ishte Xavi Espart. Talenti i akademisë së Barcelonës zhvilloi një paraqitje të mirë në krahun e djathtë të mbrojtjes, ndërsa shënoi edhe golin që i mundësoi përkohësisht skuadrës katalunase ta barazonte rezultatin. Flick u shpreh i impresionuar me nivelin e tij dhe kujtoi përparimin që ka bërë që nga sezoni i kaluar. “Xavi Espart është në një nivel të jashtëzakonshëm. Më kujtohet se sezonin e kaluar isha i befasuar me nivelin e tij. Më pas erdhi Kampionati Evropian U19 dhe pas tij u bashkua drejtpërdrejt me ne. Që atëherë ka luajtur në nivel të lartë”, tha Flick. Trajneri vlerësoi veçanërisht edhe paraqitjen e tij në aspektin defensiv, duke pasur parasysh nivelin e kundërshtarit. “Nuk ishte e lehtë për Xavi Espartin të mbrohej sot, por ai luajti në një nivel të jashtëzakonshëm. Duhet të përqendrohemi te gjërat pozitive, sepse pati të tilla. Nuk ishte e lehtë të luaje në atë mënyrë në krahun e djathtë të mbrojtjes”, shtoi ai. Një tjetër shqetësim për Barcelonën është gjendja e Dani Olmos, i cili u detyrua ta braktiste fushën gjatë pjesës së parë pas një goditjeje të marrë. Flick bëri të ditur se ende nuk e di shkallën e lëndimit të mesfushorit dhe se duhet pritur për të kuptuar më shumë rreth gjendjes së tij. “Olmo është shumë i zhgënjyer. Nuk e dimë se çfarë lëndimi ka. Duhet të presim dhe ta shohim”, deklaroi trajneri. Flick foli edhe për vendimin që Marc Bernal ta niste ndeshjen si titullar në vend të Rodrit, të cilin e la në stol për ta menaxhuar ngarkesën fizike pas minutave të shumta të luajtura në ndeshjet e fundit. “Kam folur me të këtë mëngjes për t’i treguar Rodrit se Bernal do të luante nga minuta e parë. Jemi të vetëdijshëm për lodhjen e Rodrit dhe minutat e shumta që ka grumbulluar”, shpjegoi Flick. Trajneri ishte i kënaqur me paraqitjen e Bernalit, veçanërisht në pjesën e parë, ndërsa beson se pushimi do ta ndihmojë Rodrin të jetë në gjendje më të mirë për sfidën e radhës. “Bernal luajti një ndeshje të mirë, sidomos në pjesën e parë, ndërsa Rodri do të jetë i freskët për El Clasicon”, përfundoi Flick.