Spanja mposht Anglinë në “Wembley” dhe regjundon ndeshjen e 39-të radhazi pa humbje

Një mbrëmje spektakolare është zhvilluar të shtunën në stadiumin “Wembley”, ku Spanja dhe Anglia dhuruan një përballje të mbushur me kthesa dramatike në rezultat. Përballja mes dy kombëtareve u mbyll me triumfin e “La Roja”-s ndaj “Tre Luanëve” me rezultatin 3-2, një fitore kjo që e çon në 39 numrin e ndeshjeve radhazi pa pësuar humbje për spanjollët. Pas përfundimit të sfidës, trajneri Luis De La Fuente u paraqit para mediave në konferencën për shtyp për të analizuar këtë përballje të fortë ndaj skuadrës së drejtuar nga Thomas Tuchel. Duke folur për ecurinë e takimit, De La Fuente u shpreh: “Patëm 6-7 minuta ku një superfuqi na bëri dëme. Besoj se në përgjithësi, ndeshja ishte nën kontroll. Në disa raste, na kushtoi të vraponim pas shpinës së kundërshtarit”. Tekniku spanjoll nuk i kurseu lëvdatat për grupin e tij: “E gjithë kjo uri është meritë e futbollistëve. Janë ambiciosë dhe me dëshirë për t’u përmirësuar. Kjo është meritë e këtij grupi që ka treguar vlera përtej aspektit futbollistik. Janë vlera jetësore që iu bashkohen talentit të madh futbollistik”. Duke komentuar serinë historike të ndeshjeve pa humbje, ai shtoi: “Nxjerr në pah rrugëtimin e këtij brezi. Shifrat janë aty. Është shumë e vështirë të bësh atë që po bën kjo skuadër. Ndeshja e radhës do të jetë sikur të jetë e fundit. Ky është sekreti”. Në lidhje me momentin vendimtar të ndeshjes dhe penalltinë e anglezëve, trajneri theksoi: “Përmbysja nisi kur patëm 3 raste të pastra dhe nuk i shënuam. E shihja skuadrën të aftë për të reaguar në çdo rrethanë. Jam i sigurt se edhe me rezultatin 3-1 do të kishim reaguar njësoj”. I pyetur për paraqitjen e Ferran Torres, De La Fuente u shpreh: “Hugo Sanchez ishte shënuesi më i mirë me golat e shënuar me prekje të parë. Ferran është një goleador shumë i mirë. Jam i kënaqur me punën e tij dhe prej saj përfitoi më pas Mikel Oyarzabal. Kjo është një punë skuadre dhe kjo është forca që kemi”. Në fund, ai bëri një koment edhe për talentin e ri Lamine Yamal: “Nuk e di se çfarë i kërkon Barcelona. Ne i kërkojmë të bëjë atë që i përshtatet më mirë stilit tonë të lojës. Është një mrekulli që është me ne”.