Përplasje e ashpër në Shtëpinë e Bardhë: Trump 'sulmon' verbalisht gazetarin britanik

Presidenti i Shteteve të Bashkuara, Donald Trump, është përfshirë sërish në një përballje të tensionuar me përfaqësuesit e medias. Këtë herë, në qendër të incidentit ka qenë korrespondenti i gazetës britanike “The Independent”, Andrew Feinberg, ndaj të cilit kreu i Shtëpisë së Bardhë ka përdorur gjuhë mjaft të ashpër gjatë një konference për shtyp. Ngjarja u regjistrua në momentin kur administrata Trump po prezantonte një projektligj të ri, që synon shpërblimin financiar të qytetarëve në rast të denoncimit të mashtrimeve. Pikërisht në këtë atmosferë, pyetja e drejtuar nga Feinberg shkaktoi reagimin e menjëhershëm dhe të pakontrolluar të presidentit amerikan. “Nuk e di se kush dreqin je, por bëj mirë të kesh kujdes”, ishin fjalët e drejtpërdrejta të Trumpit, një moment ky që u kap nga kamerat dhe bëri xhiron e rrjeteve sociale. Tensioni u rrit më tej kur gazetari tentoi të kërkonte sqarime mbi planet për rehabilitimin e një fushe publike golfi në kryeqytetin amerikan. Në ato çaste, presidenti e ndërpreu ashpër duke i kërkuar atij të heshtte. “Hesht! Çfarë ke?”, iu drejtua Trump gazetarit në një ton urdhërues. Përplasja nuk u ndal me kaq, pasi presidenti amerikan e vuri në dyshim shëndetin mendor të gazetarit, duke i thënë: “Je çmendur? Vërtet mendoj se diçka nuk është në rregull me ty”. Ky episod shënon një tjetër hallkë në zinxhirin e marrëdhënieve të acaruara mes Donald Trump dhe përfaqësuesve të mediave ndërkombëtare, duke dëshmuar edhe një herë stilin e tij të drejtpërdrejtë dhe shpesh konfliktual në komunikimet publike.