Hoti në takim me Koalicionin e Organizatave Vendore: Fokus te reformat në tregun e punës dhe siguria

Ministri për Punë, Familje dhe Vlerat e Luftës Çlirimtare, Andin Hoti, ka zhvilluar një takim pune me përfaqësues të Koalicionit të Organizatave Vendore. Në qendër të këtij bashkëbisedimi ishin sfidat kyçe që lidhen me tregun e punës, duke përfshirë të drejtat e punonjësve, standardet e sigurisë dhe shëndetit në vendin e punës, si dhe politikave sociale gjithëpërfshirëse. Një vëmendje e veçantë iu kushtua integrimit në tregun e punës të personave që përballen me sfida të shëndetit mendor. Gjatë këtij takimi, ministri Hoti shpalosi reformat që po zbatohen në Inspektoratin Qendror të Punës. Këto ndryshime synojnë avancimin e kornizës ligjore, forcimin e dialogut social ndërmjet palëve, si dhe stimulimin e pjesëmarrjes aktive të grave në punësim. Në njoftimin zyrtar bëhet e ditur se është diskutuar edhe për modernizimin e proceseve, konkretisht për digjitalizimin e inspektimeve. Një hap konkret drejt fuqizimit të këtij institucioni është edhe procesi i rekrutimit të 39 inspektorëve të rinj, të cilët pritet të kontribuojnë në mbikëqyrjen më efikase të zbatimit të ligjit. Në fund të takimit, u theksua se partneriteti me shoqërinë civile është i pazëvendësueshëm për hartimin e politikave të qëndrueshme dhe gjithëpërfshirëse, të cilat garantojnë një mjedis më të sigurt dhe më të drejtë për të gjithë punëtorët në vend.