Pas trazirave të dhunshme në Francë: Parisin e mbulon heshtja, ndërsa Italia mobilizon ushtrinë

Pas një fundjave të karakterizuar nga përplasje të ashpra mes protestuesve dhe forcave të rendit, kryeqyteti francez ka përjetuar një qetësi relative. Bilanci i trazirave në Paris, Lion, Marsejë dhe qytete të tjera është mjaft i rëndë, me rreth 2 mijë e 400 persona të ndaluar nga policia. Gjatë këtyre akteve të dhunshme, protestuesit shkaktuan dëme të konsiderueshme, duke djegur automjete, sulmuar godina publike dhe grabitur biznese. Në Paris, autoritetet vendosën orën policore nga ora 23:00 e së hënës deri në orën 06:00 të së martës. Gjatë natës, një helikopter i policisë mbikëqyri nga ajri sheshin 'Place de la République', ndërsa ekipet e pastrimit punuan për të hequr mbishkrimet dhe simbolin gjigant të 'jelekëve të verdhë', duke u përpjekur të kthejnë normalitetin në monumentet e dëmtuara. Kryeministri Sébastien Lecornu vlerësoi se ora policore ka qenë një masë efikase, duke theksuar se qëllimi kryesor mbetet rivendosja e menjëhershme e rendit publik. Ai hodhi akuza të rënda ndaj grupeve radikale të ekstremit të majtë, të cilat sipas tij kanë hartuar një plan kryengritjeje për të nxitur dhunën. Në të njëjtën linjë, ministri i Brendshëm, Laurent Nunez, konfirmoi se për protestat e ardhshme të së shtunës, policia do të mbështetet nga forca ushtarake. Ndërkohë, ministri i Drejtësisë, Gérald Darmanin, bëri të ditur se nga numri i përgjithshëm i të arrestuarve, 149 persona janë dënuar me burg, ndërsa mbi 800 të tjerë kanë dalë para prokurorëve. Darmanin paralajmëroi se protestuesit do të përballen me ndëshkime tepër të ashpra. Në këtë situatë, reagoi edhe presidenti amerikan, Donald Trump, i cili u bëri thirrje autoriteteve franceze të ashpërsojnë masat për sigurinë, duke kërkuar mbylljen e kufijve dhe duke e cilësuar Francën si një vend që po përballet me rreziqe të mëdha nga emigracioni dhe ekstremizmi. Vala e trazirave ka kapërcyer kufijtë e Francës, duke prekur edhe Italinë. Në Milano, përplasjet mes të rinjve dhe policisë kanë sjellë dëme materiale dhe lëndime të disa efektivëve. Zëvendëskryeministri dhe ministri i Jashtëm, Antonio Tajani, njoftoi se qeveria e kryeministres Giorgia Meloni do të miratojë dërgimin e 500 ushtarëve me kompetenca policore në Milano. Këto incidente, që nisën si protesta kundër krizës së kostos së jetesës, degjeneruan në sulme ndaj dyqaneve dhe supermarketeve, duke detyruar shtetin të ndërhyjë me masa emergjente.