Nga fusha në nacionalizëm: Si e fabrikuan mediat serbe përplasjen e Vlahoviqit me Ernest Muçin

Përballja mes Trabzonsporit dhe Beşiktaşit u mbyll me rezultatin e pastër 2-0 në favor të vendasve. Megjithatë, në hapësirën mediatike serbe, vëmendja nuk u përqendrua te sfida e gjelbër, por te një tension i çastit ndërmjet Ernest Muçit dhe Dushan Vlahoviqit, një episod që u shfrytëzua për të nxitur narrativa nacionaliste. Ngjarja ndodhi gjatë fraksionit të dytë të ndeshjes së javës së tetë në Superligën turke, kur sulmuesi i Beşiktaşit, Vlahoviqi, shfaqur qartësisht i pakënaqur me bashkëlojtarët e tij. Muçi, i cili ndodhej pranë tij, i drejtoi disa fjalë, duke shkaktuar një reagim të menjëhershëm agresiv të serbit, i cili iu afrua kërcënueshëm. Ndërhyrja e shpejtë e mbrojtësit të Trabzonsporit, Wagner Pina, shmangi çdo përshkallëzim të mundshëm, duke bërë që situata të qetësohej pa u shënuar përleshje fizike dhe pa ndëshkime disiplinore me kartonë. Incidenti mori dhenë vetëm një ditë më vonë, falë një videoje që u shpërnda masivisht në platformat e rrjeteve sociale. Të paktën tri prej mediave më të mëdhe në Serbi e kapën menjëherë këtë material filmik, duke e vënë në shënjestër kombësinë e sulmuesit kuqezi që në krye të lajmit. Gazeta Kurir e hapi shkrimin e saj me titullin me shkronja të mëdha “UMALO TUÇA!” (“Gati përleshje!”), duke shtuar: “Shikoni si u përplas Vlahoviqi me shqiptarin! Serbi iu fut në fytyrë”. Në tekstin e brendshëm, Vlahoviqi etiketohej si “sulmuesi ynë”, ndërsa Muçi përmendej thjesht si “futbollist shqiptar”. Nga ana e saj, Telegraf raportoi se “Dushan Vlahoviqi gati u përplas me shqiptarin”, duke përdorur gjithashtu termin pronor “Dushan Vlahoviqi ynë” për lojtarin serb dhe duke e cilësuar Muçin thjesht si një “futbollist nga Shqipëria”. Portali Espreso ndoqi një qasje edhe më të skajshme, me titullin sensacionalist: “Do të takohemi diku sërish! Shqiptari i hodhi diçka serbit”. Megjithatë, në brendësi të artikullit pranohej hapur se “mbetet e panjohur se çfarë i tha saktësisht sulmuesi shqiptar”, duke dëshmuar se titulli nuk kishte asnjë mbështetje faktike në përmbajtje. Asnjë prej këtyre redaksive nuk e pa të rrugës të përmendte faktin se Vlahoviqi sapo kishte pësuar një humbje 2-0 nga skuadra e Muçit, ku goli i dytë ishte realizuar nga Mohamed Salahu. Për Muçin, kjo përballje mbante një peshë të veçantë emocionale dhe profesionale. Sulmuesi nga Tirana iu bashkua Beşiktaşit në vitin 2024 nga rradhët e Legias së Varshavës, por nuk arriti të sigurojë një fanellë titullari në Stamboll. Në shtator të vitit 2025, ai u huazua te Trabzonspori për 1 milion euro, me një opsion blerjeje të parashikuar në marrëveshje. Kjo lëvizje i dha mundësinë të rifitonte formën e dikurshme: gjatë dhjetorit të vitit 2025, ai realizoi gola në katër ndeshje radhazi në kampionat, duke vendosur një rekord të ri në karrierën e tij, ku një nga këto gola i shënoi pikërisht ish-skuadrës së tij, Beşiktaşit, në barazimin spektakolar 3-3. Në maj të vitit 2026, drejtuesit e Trabzonsporit aktivizuan klauzolën, duke e blerë përfundimisht kartonin e tij për 8.5 milionë euro. Kështu, triumfi i kësaj jave ndaj Beşiktaşit përfaqësonte një dëshmi të fortë dhe një përgjigje sportive ndaj klubit që kishte hequr dorë prej tij. Në opinionin sportiv në Turqi, ky incident u trajtua thjesht si një episod normal i tensionit brenda një derbi të zjarrtë: dy lojtarë që shkëmbejnë fjalë të ashpra dhe një shok skuadre që ndërhyn për t'i ndarë. Për mediave serbe, megjithatë, ngjarja u transformua me dashje në një tablo konfrontimi “serb kundër shqiptari”, pavarësisht se asnjë fakt apo burim nuk dëshmonte se debati kishte ndonjë lidhje me përkatësinë etnike. Nga ana e tij, Ernest Muçi ka zgjedhur të mos japë asnjë koment publik lidhur me këtë çështje. Me fitoren e rëndësishme të skuadrës së tij dhe me ish-klubin të mundur në fushë, sulmuesi ka vlerësuar se fjalët e tepërta ishin krejtësisht të panevojshme.