Ministri Nufi takon komandantin e ri të KFOR-it: Roli i NATO-s, kyç për sigurinë në rajon

Ministri i Mbrojtjes i Shqipërisë, Ermal Nufi, ka zhvilluar një takim zyrtar me komandantin e sapoemëruar të misionit të NATO-s në Kosovë (KFOR), gjeneralmajor Roberto Vergori. Gjatë këtij takimi, në fokus të bisedimeve ishte misioni i KFOR-it në sigurimin e qetësisë dhe paqes në Kosovë, si dhe ndikimi i tij vendimtar në stabilitetin rajonal. Kreu i mbrojtjes shqiptare theksoi gjatë bisedës se prania dhe puna e KFOR-it mbartin një vlerë të jashtëzakonshme për Tiranën zyrtare, duke konfirmuar angazhimin e palëkundur të shtetit shqiptar në krah të këtij misioni. “KFOR-i ka një rëndësi të veçantë për Shqipërinë. Kontributi ynë i vazhdueshëm dhe i palëkundur në këtë mision dëshmon rëndësinë e veçantë që i kushtojmë mandatit dhe rolit të tij në promovimin e sigurisë dhe stabilitetit në Kosovë dhe në mbarë rajonin. Shqipëria mbetet e përkushtuar ndaj përgjegjësive të saj si anëtare e përkushtuar e NATO-s, duke vijuar të kontribuojë në përpjekjet e përbashkëta për një rajon më të sigurt, të qëndrueshëm dhe të orientuar drejt bashkëpunimit. Shumë mbarësi në këtë mandat, Gjeneralmajor Vergori!”, ka shkruar ministri Nufi në rrjetet sociale.