Limaj e quan historik reagimin e Trendafilovës: Dëshmi e qartë e ndikimit të legjislacionit të ri për Specialen

Kryetari i Nismës Socialdemokrate, Fatmir Limaj, e ka mirëpritur deklarimin e fundit të kryetares së Dhomave të Specializuara të Kosovës në Hagë, Ekaterina Trendafilova, lidhur me ndryshimet ligjore të votuara në Kuvendin e Kosovës, duke e quajtur atë një zhvillim inkurajues. I ftuar në emisionin “FIVE” në RTV Dukagjini, politikani kosovar theksoi se dalja publike dhe sqarimet e dhëna nga Trendafilova përbëjnë sinjalin e parë konkret se ligji i ri ka prodhuar efekte të ndjeshme në praktikë. Sipas Limajt, kreu i këtij institucioni nuk është lëshuar në komente të drejtpërdrejta mbi normat e reja, por është kufizuar vetëm te sqarimi i kornizës ekzistuese juridike mbi të cilën operon gjykata. Duke analizuar situatën, ai vlerësoi se kryetarja e Gjykatës Speciale ka treguar maturi institucionale, pasi është e vetëdijshme se nuk ka kompetencë ligjore për të vlerësuar apo interpretuar aktet normative që burojnë nga legislativi i Kosovës. “Së pari besoj që ky reagim vjen si pasojë e veprimeve konkrete të Kosovës, Ligjit, nuk duhet të kishin një reagim të tillë siç s’kanë pasur tash e gjashtë vite, efektet e para dhe shenjat e para të efektit të ligjit është detyrimi i zonjës Trandafilova për të dalë me dhënë këtë sqarim e prononcim dhe kjo është shenja e parë e efektit të ligjit. Unë e pashë edhe prononcimet e njerëzve rreth deklaratës së saj – së pari dua të them që kryetarja e Dhomave të Specializuara, nuk ka komentuar ligjin dhe s’ka të drejt të komentojë ligjin sic e patë edhe ju. Nuk e komentoj ligjin që është nxjerr por interpretoj mbi bazën e ligjit që punojnë dhe ishte shumë e kujdesshme në këtë drejtim sepse e dinë që nuk ka të drejtë me i interpretu ligjet e Kosovës e ato që i nxjerr Kuvendi i Kosovës – ligjin e ri me shumë kujdes e dimë se nuk ka të drejtë ta komentoj e interpretoj. Për mua është një hap pozitiv vetë detyrimi i saj me dalë me i dhanë disa sqarime pavarësisht çka tha tregon efektet e para të ligjit sepse këta tash e sa vite i ka shoqëruar arroganca, moskomunikimi e mos transparenca siç e dini edhe ju – këta e kanë parë të nevojshme me fol nëpër zyre e jo me ju drejtua qytetarëve të Kosovës në emër të të cilëve gjykojnë e punojnë”, u shpreh Limaj.