Paralajmërimi i Jose Mourinhos para Ligës së Kampionëve: Te Real Madridi vetëm stema ka vend të sigurt

Në prag të përballjes vendimtare në Ligën e Kampionëve kundër Leipzig, trajneri i Real Madridit, Jose Mourinho, ka dërguar një sinjal të prerë për të gjithë futbollistët e skuadrës, duke bërë të qartë se askush nuk gëzon status të privilegjuar apo vend të garantuar nëmbajtje, pavarësisht emrit, famës apo shifrës së majme të transferimit. I pyetur nga gazetarët mbi situatën e sulmuesit brazilian Vinicius Junior, i cili po përballet me një formë jo aq të qëndrueshme dhe së fundmi është zëvendësuar në fushë nga Yan Diomande, strategu portugez theksoi se zgjedhjet e tij do të udhëhiqen ekskluzivisht nga kontributi real në fushën e blertë. “Te ky klub, e paprekshme është vetëm stema. Asnjë lojtar nuk është i paprekshëm. Nuk ka rëndësi statusi, shiriti i kapitenit apo shuma e paguar për transferimin e një futbollisti. Ajo që e bën një lojtar të paprekshëm është rendimenti i tij në fushë”, u shpreh Mourinho gjatë konferencës për shtyp. Pavarësisht diskutimeve rreth formës, tekniku konfirmoi se Vinicius do ta nisë nga minuta e parë takimin e Champions League, megjithëse nuk preferoi të sqaronte nëse braziliani do t'i marrë vendin Diomandes në formacionin startues. “Vinicius është anësor i majtë. Mund ta aktivizoj edhe në pozicione të tjera, por ky është roli i tij natyral. Nuk mund t’i zbuloj planet e mia. Diomande nuk ka pse ta dijë paraprakisht nëse do të luajë apo jo”, shtoi më tej trajneri i Real Madridit. Mourinho pranoi hapur se ekipi i tij ka ende nevojë për hapa të rëndësishëm cilësorë për të kapur standardin që ai kërkon, duke shtuar se nuk është tipi i trajnerit që i përmbahet në mënyrë kokëfortë skemave të tij, por është i hapur ndaj përshtatjes për të mirën e grupit. “Na mungojnë shumë gjëra për të arritur atë që dëshiroj. Nuk jam nga ata trajnerë kokëfortë që janë të gatshëm të vdesin për idetë e tyre”, deklaroi ai. Për “Los Blancos”, ndeshja ndaj Leipzig përfaqëson një mundësi ideale për të zgjatur ecurinë e sukseseve dhe për të hedhur një hap të madh drejt kalimit të fazës me eliminim direkt në Ligën e Kampionëve, ku synohet triumfi i tretë radhazi. Në të njëjtën kohë, shtylla kurrizore e vëmendjes te madrilenët mbetet e ndarë, pasi në horizont shfaqet superpërballja e La Ligës kundër Barcelonës, e planifikuar për datën 25 tetor, një duel ky që premton të trazojë ujërat dhe të ndikojë ndjeshëm në luftën për kreun e renditjes tabelore.