Haxhiu pret drejtoreshën e NDI-së: Në fokus agjenda legjislative dhe barazia gjinore

Kryetarja e Kuvendit, Albulena Haxhiu, ka zhvilluar një takim zyrtar me drejtoreshën e Institutit Kombëtar Demokratik (NDI), Nancy Soderberg, ku në qendër të bisedës kanë qenë prioritetet e Kuvendit në fushën e legjislacionit, si dhe ndihma që NDI do t'i sigurojë Institutit Parlamentar. Përmes një publikimi në rrjetet sociale, Haxhiu ka njoftuar se gjatë takimit është trajtuar edhe zhvillimi i një kornize ligjore që respekton dhe përfshin në mënyrë të barabartë kërkesat e të dy gjinive. “Besoj se ligjet e mira fillojnë nga njohja e mirë e nevojave të qytetarëve. Prandaj, është e rëndësishme që Kuvendi të ketë kapacitete të fuqishme profesionale dhe që barazia gjinore të jetë pjesë e vetë procesit të hartimit dhe shqyrtimit të ligjeve”, ka theksuar ajo. Gjatë këtij takimi, kreu i Kuvendit ka shprehur mirënjohjen ndaj Soderberg për angazhimin e saj dhe ndihmën afatgjatë që organizata NDI i ka dhënë institucionit ligjvënës, duke shprehur besimin se ky partneritet do të vijojë edhe në të ardhmen për të rritur fuqinë institucionale.