Pas plot 526 ditësh në heshtje, ylli i Tottenhamit shkel sërish në fushën e blertë

Futbollisti Dejan Kulusevski ka prirë me deklaratat se ndihet si një “njeri tjetër”, kjo pas një rikthimi triumfal në radhët e Tottenhamit, duke lënë pas një kalvar të gjatë lëndimesh që e lanë larg fushave të blerta. Reprezentuesi suedez shijoi minutat e tij të para pas një mungese të frikshme prej 526 ditësh, duke kontribuar në fitoren e arritur ndaj Coventryt. Sulmuesi anësor, i cili tani e vlerëson veten si “më të mençur” dhe “person ndryshe”, u hodh në fushë në minutën e 86-të. Kjo shënoi daljen e tij të parë zyrtare që nga data 11 maj 2025, moment kur ai pësoi një dëmtim tejet të rëndë në gju. Ky rikim i shumëpritur ndodhi pikërisht në ndeshjen ku Tottenhami regjistroi suksesin e parë për edicionin e ri në Premier League, duke triumfuar ndaj Coventry Cityt me shifrat 3:1. Kulusevski vuri anën e tij emocionale në pah, duke theksuar se koha e gjatë e kaluar larg lojës i riformësoi rrënjësisht këndvështrimin për sportin dhe vetë identitetin e tij si atlet profesionist. “Jam pafundësisht mirënjohës që më është dashur ta kaloj këtë përvojë. Tani jam plotësisht gati për futbollin. E shoh veten ndryshe. Mendoj se jam njeri tjetër. Ende jam i njëjti djalë që dëshiron të luajë futboll, por tani jam pak më i mençur, prandaj jam i lumtur”, u shpreh Kulusevski për “Sky Sports”. Ish-lojtari i Juventusit analizoi sfidat komplekse psikologjike dhe fizike me të cilat u ballafaqua gjatë procesit të gjatë të rikuperimit, duke vënë theksin te pjekuria personale që fitoi gjatë kësaj kohe. Ai shtoi se ndihet krenar për qëndresën që dëshmoi përballë kësaj sprove të rëndë. Prania e tij përbën një aset të jashtëzakonshëm për klubin londinez, skuadër së cilës i kishin munguar ndjeshëm depërtimet vrastare dhe kreativiteti i suedezit përgjatë krahëve të sulmit. Duke folur me një qetësi të admirueshme për 17 muajt e fundit të rikuperimit, Kulusevski u shpreh i hapur rreth këtij rrugëtimi: “Do t’ua tregoj të gjithëve këtë rrugëtim. Ishte një përvojë e jashtëzakonshme, edhe pse ndonjëherë ishte e vështirë. Në fakt, vështirësitë janë diçka e bukur”. Kujtojmë se Kulusevski pësoi një dëmtim tejet të ndërlikuar në gju gjatë përballjes kundër Crystal Palace, ku iu dëmtuan rëndë kërcet. Megjithëse iu nënshtrua menjëherë një ndërhyrje kirurgjikale, procesi i shërimit u komplikua, duke e detyruar që gjatë dimrit vijues t'i nënshtrohej edhe një operacioni tjetër korrigjues. Për shkak të këtyre ngjarjeve fatkeqe, ish-futbollisti i Juventusit u detyrua të humbasë tërësisht edicionin garues 2025/26. Ky proces rehabilitimi u shtri në afro një vit e gjysmë, duke kërkuar angazhim maksimal në palestër dhe seanca intensive riaftësimi. Paraqitja e tij kundër Coventryt i dha fund përfundimisht një periudhe prej gati 18 muajsh jashtë fushave, duke mbyllur kështu kapitullin më të errët në karrierën e tij sportive.