Buffon thotë fjalët e mëdha për Gattuson: Do ta emëroja sërish në krye të Italisë

Gianluigi Buffon ka dalë hapur në mbrojtje të Gennaro Gattusos, duke i thurur elloge kompetencave të tij teknike dhe aftësisë së jashtëzakonshme për të drejtuar dhomat e zhveshjes. Ish-kapiteni ikonik i Juventusit dhe ish-drejtuesi i delegacionit të Përfaqësueses italiane u ndal gjithashtu te situata e vështirë e “Zonjës së Vjetër”, duke bërë thirrje që klubi t'i besojë dhe t'i japë hapësirë të mjaftueshme Luciano Spallettit. “Nëse ka një fije shprese, ajo lidhet me mbështetjen ndaj Spallettit deri në përmbyllje të ciklit. Kur ndërron pesë trajnerë brenda katër sezoneve, është e qartë se rrënja e problemit nuk qëndron më tek ai që udhëheq stolin”, u shpreh Buffon gjatë një bisede për të përditshmen italiane. Ai kërkoi mirëkuptim për shkak të mungesave të shumta në radhët e bardhezinjve, duke përmendur futbollistë kyç si Yildiz, Locatelli, Thuram dhe Milik. Gjithashtu, Buffon vuri në pah faktin se Spalletti kishte në dispozicion vetëm pak kohë për të përgatitur skuadrën, pas angazhimit në Vigo dhe transfertave të mundimshme drejt Torinos. Lidhur me Gattuson, ish-portieri legjendar theksoi se besimi i dhënë për t'i besuar stolin e Italisë mbetet një vendim krejtësisht i drejtë. “E mbështeta emërimin e tij në krye të Kombëtares, pasi isha i vetëdijshëm se do të fitonte menjëherë besimin e grupit, duke transmetuar ndjenjën e fanellës dhe lidhje të ngushtë emocionale. Ai vinte me një bagazh prej 12 vitesh eksperiencë në stol, personalitet të fortë dhe kompetencat e duhura për t'i dhënë fund krizës së identitetit të Italisë”, shtoi ai. Në vlerësimin e tij, Buffon e vuri Gattuson në të njëjtin nivel me Marcello Lippin, duke e krahasuar për mënyrën se si sillet me ekipin dhe aftësinë unike për të stimuluar grintën e lojtarëve. Në mbrojtje të trajnerit pas eliminimit të Italisë nga Kupa e Botës, ai hodhi poshtë çdo aludim për ta quajtur atë paraqitje si “katastrofë”. Buffon kujtoi se “Të Kaltrit” luajtën për pjesën më të madhe të kohës me një lojtar më pak në fushën e Bosnjës, shpërdoruan disa mundësi ideale shënimi dhe u penalizuan nga mungesa e një ndëshkimi me karton të kuq ndaj Palestrës. “A mund të flasim vërtet për dështim total? Sikur sfida të myllyhej me fitoren 1-0, të gjithë do të flisnim me superlativa për shpirtin luftarak. Për shkak të një humbjeje nga pika e bardhë e penalltive, u etiketua gjithçka si dështim. Ky lloj gjykimi ekstrem nuk ka asnjë logjikë”, përfundoi Buffon.